കാനഡയിലെ തൊഴിലാളികളുടെ ശരാശരി വേതനം കഴിഞ്ഞ വര്‍ഷത്തെ അപേക്ഷിച്ച് ഈ ഏപ്രിലില്‍ വര്‍ധിച്ചു. വേതന വര്‍ധന പണപ്പെരുപ്പത്തേക്കാള്‍ വേഗത്തില്‍ നടന്നതായും സ്റ്റാറ്റിസ്റ്റിക്‌സ് കാനഡയുടെ റിപ്പോര്‍ട്ടില്‍ പറയുന്നു. ഇതോടെ, കനേഡിയന്‍ തൊഴിലാളികളുടെ ശരാശരി പ്രതിവാര വേതനം 1,297 ഡോളര്‍ ആയി ഉയര്‍ന്നു. കഴിഞ്ഞ വര്‍ഷത്തെ അപേക്ഷിച്ച് ഇത് 4.4% വര്‍ധനയാണ്. അതേസമയം, ഈ കാലയളവിലെ പണപ്പെരുപ്പം 1.7% മാത്രമായിരുന്നുവെന്ന് റിപ്പോര്‍ട്ട് സൂചിപ്പിക്കുന്നു.
റിയല്‍ എസ്റ്റേറ്റ് മേഖലയിലെ ശരാശരി പ്രതിവാര വേതനം 9.7% വര്‍ധിച്ച് 1,361 ഡോളര്‍ ആയി. വിവര-സാംസ്‌കാരിക വ്യവസായങ്ങളിലെ ജീവനക്കാരുടെ വേതനം 10% വര്‍ധിച്ച് 1,875 ഡോളറായപ്പോള്‍ ഖനനം, എണ്ണ, വാതക മേഖലയില്‍ ഏറ്റവും ഉയര്‍ന്ന വേതനം രേഖപ്പെടുത്തി- തൊഴിലാളികളുടെ ശമ്പളം 5% വര്‍ധിച്ച് 2,492 ഡോളറായി.
അതേസമയം, ചില മേഖലകളില്‍ തൊഴില്‍ അവസരങ്ങള്‍ കുറഞ്ഞതായും റിപ്പോര്‍ട്ടില്‍ പറയുന്നു. ആരോഗ്യ-സാമൂഹിക സേവനം, താമസം, നിര്‍മ്മാണ മേഖല എന്നിവിടങ്ങളിലാണ് ഒഴിവുകള്‍ കുറഞ്ഞത്. ബ്രിട്ടിഷ് കൊളംബിയ, ആല്‍ബര്‍ട്ട, ന്യൂ ബ്രണ്‍സ്വിക്ക്, ന്യൂഫിന്‍ലന്‍ഡ് ആന്‍ഡ് ലാബ്രഡോര്‍ തുടങ്ങിയ പ്രവിശ്യകളിലാണ് ഇത് കൂടുതലായി ബാധിച്ചത്. മറ്റ് ആറ് പ്രവിശ്യകളില്‍ കാര്യമായമാറ്റങ്ങളില്ല.
