ഇന്ത്യന് ക്രിസ്ത്യന് എക്യുമെനിക്കല് കമ്മ്യൂണിറ്റി ഓഫ് ഹ്യൂസ്റ്റൺ (ICECH) സംഘടിപ്പിച്ച ബൈബിള് ക്വിസ് മത്സരത്തിൽ സെൻ്റ് പീറ്റേഴ്സ് & സെൻ്റ് പോള്സ് ഓര്ത്തഡോക്സ് ചര്ച്ച് ഹ്യൂസ്റ്റൺ വിജയികളായി. ജൂലൈ 12-ന് ഉച്ചയ്ക്ക് രണ്ടിന് സെൻ്റ് മേരീസ് മലങ്കര ഓര്ത്തഡോക്സ് സുറിയാനി ദേവാലയത്തില് നടന്ന മത്സരത്തിൽ ഹ്യൂസ്റ്റണിലെ വിവിധ അംഗസഭകളില് നിന്നുള്ള 14 ടീമുകള് പങ്കെടുത്തു. രണ്ടാം സ്ഥാനം സെൻ്റ് ഗ്രിഗോറിയോസ് ഓര്ത്തഡോക്സ് ചര്ച്ച്, ഹ്യൂസ്റ്റൺ കരസ്ഥമാക്കിയപ്പോൾ ഹ്യൂസ്റ്റൺ സെൻ്റ് പീറ്റേഴ്സ് മലങ്കര കത്തോലിക്കാ ചര്ച്ച് മൂന്നാം സ്ഥാനവും സ്വന്തമാക്കി. സ്റ്റാഫോര്ഡ് സിറ്റി മേയര് കെന് മാത്യു മുഖ്യാതിഥിയായി പങ്കെടുത്ത് വിജയികള്ക്ക് ട്രോഫികളും സമ്മാനങ്ങളും വിതരണം ചെയ്തു.
മത്സരങ്ങള്ക്കു തുടക്കം കുറിച്ച് സെൻ്റ് മേരീസ് മലങ്കര ഓര്ത്തഡോക്സ് സുറിയാനി ദേവാലയ വികാരി റവ. ഫാ. രാജേഷ് കെ. ജോണ് പ്രാരംഭ പ്രാര്ത്ഥനയ്ക്ക് നേതൃത്വം നല്കി. ഐസിഇസിഎച്ച് പ്രസിഡൻ്റ് റവ. ഫാ. ഡോ. ഐസക് ബി. പ്രകാശ് അധ്യക്ഷ പ്രസംഗം നടത്തി. സെക്രട്ടറി ഷാജന് ജോര്ജ് സ്വാഗതം ആശംസിച്ചു. റവ. ദീബു എബി ജോണ് (സെൻ്റ് തോമസ് CSI ചര്ച്ച് ഓഫ് ഗ്രേറ്റര് ഹ്യൂസ്റ്റൺ വികാരി), റവ. ജോണ് വില്സണ് (ഇമ്മാനുവേല് മാര്ത്തോമാ ഇടവക അസിസ്റ്റൻ്റ് വികാരി) എന്നിവര് ക്വിസ് മാസ്റ്റര്മാരായി നേതൃത്വം നല്കി. മത്സരത്തില് പങ്കെടുത്ത എല്ലാ ടീമുകള്ക്കും പ്രോത്സാഹന ഫലകങ്ങള് സമ്മാനിച്ചു.
