അമേരിക്കൻ ചരിത്രത്തിലെ ഏറ്റവും ദൈർഘ്യമേറിയ ഫെഡറൽ അടച്ചുപൂട്ടൽ അവസാനിപ്പിക്കുന്നതിനുള്ള നിയമനിർമാണത്തിന് അംഗീകാരം നൽകി യുഎസ് സെനറ്റ്. ഡെമോക്രാറ്റിക് പാർട്ടിക്കുള്ളിൽ ശക്തമായ വിമർശനങ്ങൾ നേരിട്ടെങ്കിലും, റിപ്പബ്ലിക്കൻമാരുമായി ധാരണയിലെത്തിയ ഒരു ചെറിയ സംഘം ഡെമോക്രാറ്റുകളാണ് തിങ്കളാഴ്ച ബിൽ പാസാക്കാൻ സഹായിച്ചത്. 60-40 വോട്ടുകൾക്കാണ് സെനറ്റ് ബിൽ പാസാക്കിയത്. എന്നാൽ, സെപ്തംബർ പകുതി മുതൽ അവധിയിലായിരുന്ന ജനപ്രതിനിധി സഭ (House of Representatives) അംഗങ്ങൾ വോട്ട് രേഖപ്പെടുത്താനായി തിരിച്ചെത്തിയാൽ മാത്രമേ അടച്ചുപൂട്ടൽ പൂർണ്ണമായും അവസാനിക്കൂ. പ്രസിഡന്റ് ഡോണൾഡ് ട്രംപ് ഈ ബില്ലിന് പിന്തുണ പ്രഖ്യാപിച്ചിട്ടുണ്ട്.

ഏകദേശം ആറ് ആഴ്ച നീണ്ട സ്തംഭനമാണ് ഇതോടെ അവസാനിക്കുന്നത്. ആരോഗ്യ പരിരക്ഷാ നികുതി ആനുകൂല്യങ്ങൾ ജനുവരി 1-ന് കാലഹരണപ്പെടുന്ന സാഹചര്യത്തിൽ ഇത് നീട്ടി നൽകാൻ റിപ്പബ്ലിക്കൻമാർ ചർച്ച നടത്തണമെന്ന് ഡെമോക്രാറ്റുകൾ ആവശ്യപ്പെട്ടിരുന്നു. എന്നാൽ, ചർച്ചകൾ നടക്കാത്തതിനെ തുടർന്ന്, ഫെഡറൽ സഹായ വിതരണം തടസ്സപ്പെടുകയും വിമാനത്താവളങ്ങളിലെ കാലതാമസം വർധിക്കുകയും ലക്ഷക്കണക്കിന് ഫെഡറൽ ജീവനക്കാർക്ക് ശമ്പളം ലഭിക്കാതെ വരികയും ചെയ്തതോടെ, അഞ്ച് മിതവാദി ഡെമോക്രാറ്റുകൾ തങ്ങളുടെ നിലപാട് മാറ്റി ബില്ലിന് അനുകൂലമായി വോട്ട് ചെയ്തു. ന്യൂ ഹാംഷെയറിലെ സെനറ്റർമാരായ ജീൻ ഷഹീൻ, മാഗി ഹസ്സൻ, മെയ്‌നിലെ സ്വതന്ത്ര സെനറ്റർ അംഗസ് കിങ് എന്നിവരടങ്ങുന്ന സംഘമാണ് പുതിയ ധാരണയ്ക്ക് വഴിയൊരുക്കിയത്.