കാനഡ-യു എസ് -മെക്സിക്കോ കരാർ (CUSMA) റദ്ദാക്കപ്പെട്ടാൽ കാനഡയും യുഎസും വൻ തിരിച്ചടി നേരിടേണ്ടി വരുമെന്ന് പഠന റിപ്പോർട്ട്. കരാർ പുതുക്കിയില്ലെങ്കിൽ കാനഡയിൽ ഒരു ലക്ഷത്തിലധികം തൊഴിലവസരങ്ങളും അമേരിക്കയിൽ രണ്ട് ലക്ഷത്തിലധികം തൊഴിലവസരങ്ങളും ഇല്ലാതാകാൻ സാധ്യതയുണ്ടെന്ന് ‘ഓക്സ്ഫോർഡ് ഇക്കണോമിക്സ്’ തയ്യാറാക്കിയ റിപ്പോർട്ടിൽ പറയുന്നു.
വ്യാപാര കരാറിൻ്റെ അഭാവം ഇരുരാജ്യങ്ങളിലെയും ഉൽപ്പാദന അധിഷ്ഠിത വ്യവസായങ്ങളെയാകും പ്രാഥമികമായി പ്രതികൂലമായി ബാധിക്കുക. 2035-ഓടെ അമേരിക്കൻ ജി.ഡി.പിയിൽ 1.04 ട്രില്യൺ ഡോളറിൻ്റെയും കനേഡിയൻ ജി.ഡി.പിയിൽ 271 ശതകോടി ഡോളറിൻ്റെയും ഉൽപ്പാദന നഷ്ടം ഇതിലൂടെ സംഭവിക്കാം. നിർമ്മാണ മേഖലയിലുണ്ടാകുന്ന ഈ തിരിച്ചടി, ഉപഭോക്തൃ ചെലവഴിക്കൽ കുറയ്ക്കുകയും സേവന മേഖലയിലേക്ക് കൂടി സാമ്പത്തിക മാന്ദ്യം പടർത്താൻ ഇടയാക്കുകയും ചെയ്യുമെന്ന് പഠനം ചൂണ്ടിക്കാണിക്കുന്നു.
അതേസമയം, പരസ്പര ധാരണയോടെ സാമ്പത്തിക പങ്കാളിത്തം ശക്തിപ്പെടുത്തുകയും കരാർ വിജയകരമായി പുതുക്കുകയും ചെയ്താൽ വലിയ മുന്നേറ്റം സാധ്യമാകുമെന്നും സാമ്പത്തിക വിദഗ്ദ്ധർ വിലയിരുത്തുന്നു. തർക്കങ്ങൾ പരിഹരിച്ച് മുന്നോട്ടുപോവുകയാണെങ്കിൽ അമേരിക്കയിൽ 1,37,000-ഉം കാനഡയിൽ 98,000-ഉം പുതിയ തൊഴിലവസരങ്ങൾ സൃഷ്ടിക്കാൻ സാധിക്കും. അതിനാൽ ഇരുരാജ്യങ്ങളുടെയും ദീർഘകാല സാമ്പത്തിക സ്ഥിരതയ്ക്കും വിപണി സുരക്ഷിതത്വത്തിനും CUSMA കരാർ തടസ്സമില്ലാതെ തുടരേണ്ടത് അത്യന്താപേക്ഷിതമാണെന്ന് റിപ്പോർട്ട് അടിവരയിടുന്നു.
