ഓട്ടവ: റഷ്യയിൽ നിന്നുള്ള ഹൈബ്രിഡ് യുദ്ധമുറകളെയും സൈബർ ആക്രമണങ്ങളെയും നേരിടാൻ കാനഡ പ്രതിരോധം ശക്തമാക്കുന്നു. നാറ്റോ സഖ്യകക്ഷികളായ ബാൾട്ടിക്-നോർഡിക് രാജ്യങ്ങളുടെ പ്രതിരോധ തന്ത്രങ്ങൾ കാനഡ മാതൃകയാക്കണമെന്ന് അന്താരാഷ്ട്ര നയതന്ത്ര പ്രതിനിധികൾ ആവശ്യപ്പെട്ടു. ഓട്ടവയിൽ പോളിഷ് എംബസി സംഘടിപ്പിച്ച ചർച്ചയിലാണ് ഈ നിർദ്ദേശങ്ങൾ ഉയർന്നുവന്നത്.
യൂറോപ്യൻ രാജ്യങ്ങളിൽ റഷ്യ നടപ്പിലാക്കി വരുന്ന അട്ടിമറി നീക്കങ്ങൾ ഭാവിയിൽ കാനഡയുടെ ആർട്ടിക് മേഖലയിലും ആവർത്തിക്കാൻ സാധ്യതയുണ്ടെന്നാണ് സുരക്ഷാ ഉദ്യോഗസ്ഥർ നൽകുന്ന മുന്നറിയിപ്പ്. പ്രധാനമായും മൂന്ന് തരത്തിലുള്ള വെല്ലുവിളികളാണ് റഷ്യ ഉയർത്തുന്നത്; റെയിൽ പാളങ്ങളിൽ ബോംബ് സ്ഥാപിക്കുന്നത് പോലുള്ള നേരിട്ടുള്ള അട്ടിമറി പ്രവർത്തനങ്ങൾ, ഊർജ്ജ-വാർത്താവിനിമയ ശൃംഖലകളെ ലക്ഷ്യം വെച്ചുള്ള ഡ്രോൺ ആക്രമണങ്ങൾ, ഡിജിറ്റൽ സംവിധാനങ്ങളെ തകർക്കുന്ന സൈബർ യുദ്ധം എന്നിവയാണവ. ഇത്തരം ഹൈബ്രിഡ് യുദ്ധമുറകളിലൂടെ കാനഡയുടെ സുരക്ഷയെയും സഖ്യകക്ഷികളുടെ ഐക്യത്തെയും തകർക്കാനാണ് റഷ്യ ലക്ഷ്യമിടുന്നത്.
റഷ്യൻ ആക്രമണങ്ങളെ നേരിടാൻ സ്വീഡൻ വിജയകരമായി നടപ്പിലാക്കുന്ന ‘ടോട്ടൽ ഡിഫൻസ് സിസ്റ്റം‘ കാനഡയ്ക്കും സ്വീകരിക്കാവുന്നതാണെന്ന് സ്വീഡിഷ് അംബാസഡർ സിഗ്നെ ബർഗ്സ്റ്റാളർ നിർദ്ദേശിച്ചു.
എന്താണ് ടോട്ടൽ ഡിഫൻസ് സിസ്റ്റം? ഇത് സൈനിക പ്രതിരോധം മാത്രമല്ല; യുദ്ധമോ അടിയന്തര സാഹചര്യങ്ങളോ ഉണ്ടായാൽ അത് നേരിടാൻ സാധാരണ പൗരന്മാർക്കും ബിസിനസ് സ്ഥാപനങ്ങൾക്കും പ്രത്യേക പരിശീലനം നൽകുന്ന രീതിയാണിത്. ഇത് രാജ്യത്തിന്റെ ആകെ പ്രതിരോധശേഷി വർദ്ധിപ്പിക്കുന്നു.
കാനഡയുടെ 40 ശതമാനത്തോളം വരുന്ന ആർട്ടിക് മേഖല റഷ്യയുടെ നിരീക്ഷണത്തിലാണെങ്കിലും പല കാനഡക്കാരും ഈ ഭീഷണി ഗൗരവമായി കാണുന്നില്ലെന്ന് ലിബറൽ എംപി അഹമ്മദ് ഹുസൈൻ അഭിപ്രായപ്പെട്ടു. പ്രവിശ്യാ ഭരണകൂടങ്ങളുടെ ആരോഗ്യ-വിദ്യാഭ്യാസ മേഖലകളിലെ ഡിജിറ്റൽ വിവരങ്ങൾ സൈബർ ആക്രമണങ്ങൾക്ക് ഇരയാകാൻ സാധ്യതയുണ്ടെന്നത് വലിയ ആശങ്കയായി ചർച്ചയിൽ ഉയർന്നു.
നാറ്റോ സഖ്യകക്ഷികളുടെ ഐക്യം തകർക്കുക എന്ന റഷ്യൻ ലക്ഷ്യത്തെ ചെറുക്കാൻ സഖ്യകക്ഷികളുമായുള്ള വിവരശേഖരണവും സഹകരണവും കൂടുതൽ ശക്തമാക്കാൻ കാനഡ തീരുമാനിച്ചു. ആർട്ടിക് മേഖലയുടെ സുരക്ഷ ഉറപ്പാക്കുന്നതിനും റഷ്യയുടെ കടന്നുകയറ്റങ്ങൾ തടയുന്നതിനും പുതിയ പ്രതിരോധ പദ്ധതികൾക്ക് രാജ്യം രൂപം നൽകും.
