ഒട്ടാവ: കാനഡയിലേക്ക് കുടിയേറാൻ ആഗ്രഹിക്കുന്നവർക്കും നിലവിൽ കാനഡയിലുള്ള താൽക്കാലിക താമസക്കാർക്കും ആശ്വാസം നൽകിക്കൊണ്ട് ഇമിഗ്രേഷൻ, റഫ്യൂജീസ് ആൻഡ് സിറ്റിസൺഷിപ്പ് കാനഡ 2026 ഫെബ്രുവരിയിലെ പുതിയ പ്രോസസിംഗ് സമയക്രമം പുറത്തുവിട്ടു. അപേക്ഷകളുടെ ആധിക്യം കുറയ്ക്കുന്നതിന്റെ ഭാഗമായി കൊണ്ടുവന്ന പുതിയ പരിഷ്കാരങ്ങൾ മൂലം പിആർ കാർഡുകൾ, വർക്ക് പെർമിറ്റുകൾ, വിസിറ്റർ വിസകൾ എന്നിവയുടെ പ്രോസസിംഗ് സമയത്തിൽ കാര്യമായ മാറ്റങ്ങളാണ് രേഖപ്പെടുത്തിയിരിക്കുന്നത്. അപേക്ഷകർക്ക് തങ്ങളുടെ കുടിയേറ്റ നടപടികൾ കൂടുതൽ കൃത്യതയോടെ ആസൂത്രണം ചെയ്യാൻ ഇത് സഹായിക്കും.
പുതിയ കണക്കുകൾ പ്രകാരം, എക്സ്പ്രസ് എൻട്രി വഴിയുള്ള പിആർ അപേക്ഷകൾ പ്രോസസ്സ് ചെയ്യാൻ നിലവിൽ ആറ് മുതൽ എട്ട് മാസം വരെയാണ് എടുക്കുന്നത്. ഫാമിലി സ്പോൺസർഷിപ്പ് വഴിയുള്ള അപേക്ഷകൾക്ക് (ഭാര്യ/ഭർത്താവ് അല്ലെങ്കിൽ പങ്കാളി) കാനഡയ്ക്കകത്തുള്ളവർക്ക് 10 മാസവും പുറത്തുള്ളവർക്ക് 12 മാസവുമാണ് ശരാശരി സമയം. പുതുതായി പിആർ ലഭിച്ചവർക്ക് ആദ്യത്തെ പിആർ കാർഡ് ലഭിക്കാൻ ഇപ്പോൾ 35 ദിവസത്തെ കാത്തിരിപ്പ് മതിയാകും. അതേസമയം, നിലവിലുള്ള പിആർ കാർഡ് പുതുക്കുന്നതിനോ നഷ്ടപ്പെട്ടത് വീണ്ടെടുക്കുന്നതിനോ ഏകദേശം 60 ദിവസം വരെ എടുക്കുന്നുണ്ട്.
താൽക്കാലിക താമസക്കാർക്കുള്ള വിസ നടപടികളിലും മാറ്റങ്ങളുണ്ട്. കാനഡയ്ക്ക് പുറത്തുനിന്നുള്ള വിസിറ്റർ വിസ അപേക്ഷകൾക്ക് ഓരോ രാജ്യത്തെയും അപേക്ഷകരുടെ എണ്ണത്തിനനുസരിച്ച് മാറ്റമുണ്ടാകുമെങ്കിലും ശരാശരി 45 മുതൽ 60 ദിവസം വരെയാണ് കണക്കാക്കുന്നത്. സ്റ്റഡി പെർമിറ്റുകൾക്ക് ഏകദേശം 10 ആഴ്ചയും വർക്ക് പെർമിറ്റുകൾക്ക് (കാനഡയ്ക്ക് പുറത്തുനിന്നുള്ളവർക്ക്) 15 ആഴ്ചയോളവും സമയമെടുക്കുന്നു. അപേക്ഷകളിലെ അപൂർണ്ണതയും രേഖകളുടെ കുറവും പ്രോസസിംഗ് വൈകാൻ കാരണമാകുമെന്ന് ഐആർസിസി മുന്നറിയിപ്പ് നൽകുന്നുണ്ട്. ഓൺലൈൻ പോർട്ടലുകൾ വഴി അപേക്ഷകളുടെ തൽസമയ വിവരങ്ങൾ പരിശോധിക്കാൻ സൗകര്യമുണ്ടെന്നും അപേക്ഷകർ കൃത്യമായ വിവരങ്ങൾ മാത്രം നൽകണമെന്നും അധികൃതർ വ്യക്തമാക്കി. സിറ്റിസൺഷിപ്പ് ലഭിക്കുന്നതിനുള്ള നടപടിക്രമങ്ങൾക്ക് ഇപ്പോൾ ശരാശരി 18 മാസം വരെയാണ് പ്രോസസിംഗ് സമയം കണക്കാക്കുന്നത്.
