ന്യൂഡൽഹി: രാജ്യത്തിന്റെ തദ്ദേശീയ പ്രതിരോധ ശേഷി വർദ്ധിപ്പിക്കുന്നതിന്റെ ഭാഗമായി, ഇന്ത്യൻ കമ്പനിയായ ‘നിബെ ലിമിറ്റഡ്’ (NIBE Limited) 150 കിലോമീറ്റർ, 300 കിലോമീറ്റർ പരിധിയുള്ള യഥാക്രമം ‘എക്‌സ്ട്രാ’ (EXTRA), ‘പ്രെഡേറ്റർ ഹോക്ക്’ (Predator Hawk) “സൂര്യാസ്ത്ര” റോക്കറ്റുകളുടെ പരീക്ഷണ വിക്ഷേപണം വിജയകരമായി പൂർത്തിയാക്കി. ഒഡീഷയിലെ ചാന്ദിപ്പൂരിലുള്ള ഇന്റഗ്രേറ്റഡ് ടെസ്റ്റ് റേഞ്ചിൽ (ITR) വെച്ചായിരുന്നു പരീക്ഷണം.

മെയ് 18, 19 തീയതികളിൽ തുടർച്ചയായി നടന്ന പരീക്ഷണങ്ങൾ അസാധാരണമായ കൃത്യതയോടെ എല്ലാ ലക്ഷ്യങ്ങളും കൈവരിച്ചതായി നിബെ ലിമിറ്റഡ് പ്രസ്താവനയിൽ അറിയിച്ചു. ഉദ്യോഗസ്ഥർ പറയുന്നതനുസരിച്ച്, പരീക്ഷണ വേളയിൽ രണ്ട് റോക്കറ്റുകളും വളരെ കൃത്യമായി ലക്ഷ്യസ്ഥാനങ്ങളിൽ പതിച്ചു. മിസൈലുകളുടെ കൃത്യത അളക്കുന്നതിനുള്ള മാനദണ്ഡമായ ‘സർക്കുലർ എറർ പ്രൊബബിൾ’ (CEP) യഥാക്രമം 1.5 മീറ്ററും 2 മീറ്ററും മാത്രമായിരുന്നു. ഈ പരീക്ഷണങ്ങൾ സൂര്യാസ്ത്രയുടെ ദീർഘദൂര കൃത്യതയാർന്ന ആക്രമണ ശേഷി തെളിയിക്കുന്നതാണ്. 300 കിലോമീറ്റർ വരെയുള്ള ദൂരത്തിൽ 2 മീറ്ററിൽ താഴെ മാത്രം സി.ഇ.പി (CEP) കൈവരിക്കുന്നത്, സൂര്യാസ്ത്രയെ ആഗോളതലത്തിൽ തന്നെ ഏറ്റവും കൃത്യതയാർന്ന ദീർഘദൂര റോക്കറ്റ് ആർട്ടിലറി സംവിധാനങ്ങളുടെ നിരയിലേക്ക് ഉയർത്തുന്നു. ഇത് ചുറ്റുമുള്ള മറ്റ് നാശനഷ്ടങ്ങൾ കുറച്ചുകൊണ്ട് തന്നെ ശത്രുക്കളുടെ പ്രധാന ലക്ഷ്യങ്ങളെ തകർക്കാൻ ഇന്ത്യൻ കരസേനയെ സഹായിക്കും.

പൂനെ ആസ്ഥാനമായി പ്രവർത്തിക്കുന്നതും നാഷണൽ സ്റ്റോക്ക് എക്‌സ്‌ചേഞ്ചിൽ (NSE) ലിസ്റ്റ് ചെയ്യപ്പെട്ടിട്ടുള്ളതുമായ ഈ കമ്പനിക്ക്, ‘സൂര്യാസ്ത്ര യൂണിവേഴ്സൽ റോക്കറ്റ് ലോഞ്ചറും’ റോക്കറ്റുകളും വിതരണം ചെയ്യുന്നതിനായി ഈ വർഷം ജനുവരിയിൽ ഇന്ത്യൻ കരസേനയിൽ നിന്ന് അടിയന്തര സംഭരണ പദ്ധതി പ്രകാരം പർച്ചേസ് ഓർഡർ ലഭിച്ചിരുന്നു.

ശത്രുക്കളുടെ ലക്ഷ്യസ്ഥാനങ്ങൾക്ക് നേരെ കൃത്യതയാർന്ന ഉപരിതല-ഉപരിതല (surface-to-surface) ആക്രമണം നടത്താൻ രൂപകൽപ്പന ചെയ്ത ഇന്ത്യയിലെ ആദ്യത്തെ തദ്ദേശീയവും യൂണിവേഴ്സൽ മൾട്ടി-കാലിബറുമായ റോക്കറ്റ് ലോഞ്ചർ സംവിധാനമാണ് സൂര്യാസ്ത്ര. ഇത് പരമ്പരാഗത ഫീൽഡ് ആർട്ടിലറികൾക്കും ഭാരമേറിയ ബാലിസ്റ്റിക് മിസൈലുകൾക്കും ഇടയിലുള്ള വിടവ് നികത്തുകയും, സായുധ സേനയ്ക്ക് വളരെ അയവുള്ളതും (flexible) വേഗത്തിൽ പ്രതികരിക്കാൻ കഴിയുന്നതും ചെലവ് കുറഞ്ഞതുമായ ഒരു കൃത്യതാ ആയുധ സംവിധാനം നൽകുകയും ചെയ്യുന്നു.