ആൽബർട്ട തലസ്ഥാനമായ എഡ്മിന്റനിലുള്ള നാനാക്സർ സിഖ് ഗുരുദ്വാരയിലുണ്ടായ കത്തിക്കുത്തിൽ രണ്ടു പേർക്ക് പരുക്കേറ്റു. വെള്ളിയാഴ്ച പുലർച്ചെ 5:08-ഓടെ 14 സ്ട്രീറ്റിലെ ഹോഴ്സ്ഹിൽ റോഡിലുള്ള ഗുരുദ്വാരയിലാണ് സംഭവം. കേസിൽ ഉൾപ്പെട്ട ഒരാളെ സംഭവസ്ഥലത്തു നിന്നും അറസ്റ്റ് ചെയ്തതായി എഡ്മിന്റൻ പോലീസ് സർവീസ് (EPS) അറിയിച്ചു. കത്തിക്കുത്തിൽ പരുക്കേറ്റ രണ്ടു പേരെയും ആശുപത്രിയിൽ പ്രവേശിപ്പിച്ചു.
ആക്രമണത്തെ എഡ്മിന്റൻ-സ്ട്രാത്ത്കോണ എം.പി ഹെതർ മക്ഫെർസൺ അപലപിച്ചു. സംഭവത്തിൽ സമഗ്രമായ അന്വേഷണവും ശക്തമായ നടപടികളും വേണമെന്നും അവർ ആവശ്യപ്പെട്ടു. അടുത്തിടെ രാജ്യത്തുടനീളമുള്ള നിരവധി സിഖ് ആരാധനാലയങ്ങൾക്ക് നേരെ ഭീഷണി ഉയർന്നിട്ടുണ്ട്. കഴിഞ്ഞ വാരാന്ത്യത്തിൽ കാൽഗറിയിലെ സിഖ് ഗുരുദ്വാരയ്ക്ക് നേരെ ഭീഷണി ലഭിച്ചിരുന്നു.
