ക്യൂബെക്കിൽ ഡ്രൈവിംഗ് ലൈസൻസും കുടുംബത്തിനുള്ള സഹായധനവും തമ്മിൽ ബന്ധിപ്പിക്കുന്ന പുതിയ നിയമം പ്രഖ്യാപിച്ചു. 2026 ജനുവരി 1 മുതൽ, കുട്ടികൾക്കോ പങ്കാളിക്കോ നൽകേണ്ട സഹായധനം നൽകാത്തവരുടെ ലൈസൻസ് റദ്ദാക്കിയേക്കാം. ഇതുവരെ, കാനഡയിൽ ക്യൂബെക്കും ന്യൂ ബ്രൺസ്വിക്കും മാത്രമാണ് ഈ നിയമം നടപ്പിലാക്കാതിരുന്നത്.
വരുമാനം മറച്ചുവെച്ചോ രേഖകളില്ലാതെ ജോലി ചെയ്തോ പണം നൽകാതിരിക്കുന്നവരെ തടയാനാണ് ഈ നീക്കം. നിയമപ്രകാരം, കുറഞ്ഞത് ആറ് മാസത്തെ കുടിശ്ശിക ഉണ്ടെങ്കിൽ മാത്രമേ നടപടിയുണ്ടാകൂ. കുടിശ്ശികയുള്ളവർക്ക് ‘റെവന്യൂ ക്യൂബെക്’ആദ്യം അറിയിപ്പ് നൽകും. 30 ദിവസത്തിനുള്ളിൽ കുടിശ്ശിക തീർത്തില്ലെങ്കിൽ ലൈസൻസ് റദ്ദാക്കാൻ സർക്കാർ നിർദ്ദേശം നൽകും. ഈ നിയമം സാധാരണ ലൈസൻസുകൾക്കും ലേണേഴ്സ് പെർമിറ്റുകൾക്കും ബാധകമാണ്. ക്ലാസ് 5 ലൈസൻസ് നഷ്ടമായാൽ ട്രക്കുകളോ ബസ്സുകളോ മറ്റ് വാഹനങ്ങളോ ഓടിക്കാനുള്ള അവകാശവും നഷ്ടപ്പെടും.
ലൈസൻസ് ഇല്ലാത്ത ഒരാൾ പുതിയ അപേക്ഷ നൽകിയാലും കുടിശ്ശിക തീർക്കുന്നത് വരെ അത് നിരസിക്കപ്പെടും.സസ്പെൻഡ് ചെയ്ത ലൈസൻസുമായി വാഹനം ഓടിച്ചാൽ 600 മുതൽ 2,000 ഡോളർ വരെ പിഴയും 30 ദിവസത്തേക്ക് വാഹനം പിടിച്ചെടുക്കലും നേരിടേണ്ടി വരും. നൽകാനുള്ള സഹായധനത്തേക്കാൾ വലിയ തുക പിഴയായി നൽകേണ്ടി വരുമെന്നാണ് ഉദ്യോഗസ്ഥരുടെ മുന്നറിയിപ്പ്.
