ഒൻ്റാരിയോയിൽ സ്ഥിരതാമസത്തിന് അപേക്ഷിക്കുന്ന വിദേശ പൗരന്മാർക്കായി പുതിയ ഇമിഗ്രേഷൻ പ്രോഗ്രാം ഉടൻ അവതരിപ്പിക്കുമെന്ന് പ്രവിശ്യാ സർക്കാർ. പുതിയ ടാലന്റ് സ്ട്രീമുകളാണ്‌ അവതരിപ്പിക്കുന്നതെന്ന്‌ ഒൻ്റാരിയോ ഇമിഗ്രേഷൻ മന്ത്രി ഡേവിഡ് പിച്ചീനി പറഞ്ഞു. ഒൻ്റാരിയോ ഇമിഗ്രന്റ് നോമിനി പ്രോഗ്രാമിന് (OINP) കീഴിലായാണ് പുതിയ പദ്ധതികൾ. ഗവേഷണം, പാചക കല (Culinary Arts), സംരംഭകത്വം (Entrepreneurship) തുടങ്ങിയ മേഖലകളിലെ മികവിനെ കൂടി ഉൾപ്പെടുത്തുന്ന രീതിയിലാവും പുതിയ സ്‌ട്രീമുകൾ അവതരിപ്പിക്കുന്നത്‌. അതേ സമയം പുതിയ സ്ട്രീമുകളെക്കുറിച്ചുള്ള കൂടുതൽ വിവരങ്ങൾ ഇതുവരെ പുറത്തുവിട്ടിട്ടില്ല.

അടുത്തിടെ OINP എക്സ്പ്രസ് എൻട്രി സ്കിൽഡ് ട്രേഡ്സ് സ്ട്രീമിലേക്കുള്ള അപേക്ഷകൾ പ്രവിശ്യ നിർത്തിവച്ചിരുന്നു. നിരവധി ക്രമക്കേടുകൾ കണ്ടതിൻ്റെ പശ്‌ചാത്തലത്തലത്തിലായിരുന്നു ഇത്‌. ഈ സ്ട്രീം നിർത്തലാക്കിയത് വഴി ഒന്റാരിയോയ്ക്ക് തങ്ങളുടെ നോമിനേഷൻ വിഹിതത്തിന്റെ ഒരു ഭാഗം പുതിയ, ലക്ഷ്യമിട്ട സ്ട്രീമുകളിലേക്ക് പുനഃക്രമീകരിക്കാൻ സാധിക്കും. 2025-ൽ പ്രവിശ്യാ നോമിനി പ്രോഗ്രാം (PNP) വഴിയുള്ള പ്രവേശന ലക്ഷ്യം 50 ശതമാനം കുറച്ചിരുന്നു. എന്നാൽ, ഏറ്റവും പുതിയ ഇമിഗ്രേഷൻ ലെവൽസ് പ്ലാനിൽ കാനഡ ലക്ഷ്യം 91,500 ആയി ഉയർത്തി (66 ശതമാനം വർദ്ധനവാണിത്‌). ഇതിലൂടെ 2026-ൽ ഒന്റാരിയോയ്‌ക്ക്‌ കൂടുതൽ നോമിനേഷനുകൾ അനുവദിക്കാനും പുതിയ സ്ട്രീമുകൾ തുടങ്ങാനും അവസരം ലഭിക്കും.