അമേരിക്കൻ ഹോംലാൻഡ് സെക്യൂരിറ്റി ഡിപ്പാർട്ട്മെന്റ് പ്രഖ്യാപിച്ച പുതിയ ഇമിഗ്രേഷൻ പരിഷ്കാരങ്ങൾ ഡിസംബർ 26 മുതൽ ഔദ്യോഗികമായി നിലവിൽ വന്നു. ഗ്രീൻ കാർഡ് ഉടമകൾ ഉൾപ്പെടെയുള്ള വിദേശ പൗരന്മാർക്ക് യുഎസ് അതിർത്തികളിൽ അതീവ കർശനമായ ബയോമെട്രിക് പരിശോധനകളാണ് ഇനി നേരിടേണ്ടി വരിക. ഡോണൾഡ് ട്രംപ് ഭരണകൂടം ദേശീയ സുരക്ഷ മുൻനിർത്തി നടപ്പിലാക്കുന്ന ഈ മാറ്റങ്ങൾ പ്രകാരം, അമേരിക്കയിൽ പ്രവേശിക്കുമ്പോഴും പുറത്തുപോകുമ്പോഴും എല്ലാ നോൺ-യുഎസ് പൗരന്മാരുടെയും ഫോട്ടോ എടുക്കുന്നതും ബയോമെട്രിക് ഡാറ്റ ശേഖരിക്കുന്നതും നിർബന്ധമാക്കി.
പ്രധാന മാറ്റങ്ങൾ :
പ്രായപരിധിയിലെ ഇളവുകൾ
നേരത്തെ 14 വയസ്സിൽ താഴെയുള്ള കുട്ടികൾക്കും 79 വയസ്സിന് മുകളിലുള്ളവർക്കും ബയോമെട്രിക് പരിശോധനകളിൽ ഇളവ് നൽകിയിരുന്നു. എന്നാൽ പുതിയ നിയമപ്രകാരം എല്ലാ പ്രായക്കാർക്കും ഈ പരിശോധനകൾ ബാധകമാണ്.
ബയോമെട്രിക് ശേഖരണം
ഫോട്ടോ കൂടാതെ ആവശ്യമായ ഘട്ടങ്ങളിൽ വിരലടയാളം, ഐറിസ് സ്കാൻ എന്നിവയും കസ്റ്റംസ് ആൻഡ് ബോർഡർ പ്രൊട്ടക്ഷൻ (CBP) ഉദ്യോഗസ്ഥർ ശേഖരിക്കും. ‘ട്രാവലർ വെരിഫിക്കേഷൻ സർവീസ്’ വഴി ഈ വിവരങ്ങൾ യാത്രാ രേഖകളുമായി ഒത്തുനോക്കും.
19 രാജ്യങ്ങളിൽ നിന്നുള്ളവർക്ക് പ്രത്യേക നിരീക്ഷണം
അഫ്ഗാനിസ്ഥാൻ, ഹെയ്തി, വെനസ്വേല, ഇസ്രായേൽ തുടങ്ങിയ പട്ടികയിലുള്ള 19 രാജ്യങ്ങളിൽ നിന്നുള്ള ഗ്രീൻ കാർഡ് ഉടമകളുടെ രേഖകൾ അതീവ സൂക്ഷ്മമായ പുനഃപരിശോധനയ്ക്ക് വിധേയമാക്കും. ഇവരുടെ യാത്രാ പശ്ചാത്തലം ഉദ്യോഗസ്ഥർ വിശദമായി ചോദിച്ചറിയും.
നയതന്ത്രജ്ഞർക്കും ഇളവില്ല
മുമ്പ് വിദേശ നയതന്ത്രജ്ഞർക്ക് നൽകിയിരുന്ന ചില ബയോമെട്രിക് ഇളവുകൾ പുതിയ ഉത്തരവിലൂടെ റദ്ദാക്കി.
ഡാറ്റാ സംരക്ഷണം
യുഎസ് പൗരന്മാരുടെ ബയോമെട്രിക് വിവരങ്ങൾ 12 മണിക്കൂറിനുള്ളിൽ നീക്കം ചെയ്യുമെങ്കിലും, വിദേശ പൗരന്മാരുടെ ഡാറ്റ 75 വർഷം വരെ ഡിപ്പാർട്ട്മെന്റ് സൂക്ഷിക്കും.
വിമാനത്താവളങ്ങൾ, കപ്പൽ തുറമുഖങ്ങൾ, കര അതിർത്തികൾ എന്നിവിടങ്ങളിൽ ഈ പരിശോധനകൾ ആരംഭിച്ചു കഴിഞ്ഞു. കടുത്ത പരിശോധനകൾ കാരണം അതിർത്തി കടക്കുന്നതിന് കൂടുതൽ സമയമെടുത്തേക്കാം എന്നതിനാൽ യാത്രക്കാർ കൃത്യമായ രേഖകൾ കരുതി നേരത്തെ എത്തണമെന്ന് അധികൃതർ നിർദ്ദേശിക്കുന്നു.
