കനേഡിയൻ പൗരന്മാർക്ക് സാധാരണയായി നൽകുന്ന നീല പാസ്പോർട്ടുകൾക്ക് പുറമെ, പ്രത്യേക വിഭാഗത്തിൽപ്പെട്ടവർക്കായി പച്ച നിറത്തിലുള്ള പാസ്പോർട്ടുകളും നിലവിലുണ്ടെന്ന് ഇമിഗ്രേഷൻ, റഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) അറിയിച്ചു. സോഷ്യൽ മീഡിയ പ്ലാറ്റ്ഫോമായ റെഡ്ഡിറ്റിൽ പച്ച നിറത്തിലുള്ള കനേഡിയൻ പാസ്പോർട്ടിൻ്റെ ചിത്രം പ്രചരിച്ചതിനെത്തുടർന്നാണ് ഇത് സംബന്ധിച്ച ചർച്ചകൾ സജീവമായത്.
സാധാരണ പൗരന്മാർക്ക് വ്യക്തിപരമായ ആവശ്യങ്ങൾക്കോ ബിസിനസ്സ് യാത്രകൾക്കോ നീല പാസ്പോർട്ടാണ് അനുവദിക്കുന്നത്. എന്നാൽ, പാർലമെന്റ് അംഗങ്ങൾ, സെനറ്റർമാർ, പ്രവിശ്യാ കാബിനറ്റ് അംഗങ്ങൾ, ഔദ്യോഗിക ദൗത്യങ്ങൾക്കായി വിദേശയാത്ര നടത്തുന്ന ഗവൺമെൻ്റ് ജീവനക്കാർ എന്നിവർക്കാണ് പച്ച നിറത്തിലുള്ള സ്പെഷ്യൽ പാസ്പോർട്ട് നൽകുന്നത്.
വിദേശ രാജ്യങ്ങളിൽ കാനഡയെ പ്രതിനിധീകരിച്ച് ഔദ്യോഗിക കൃത്യനിർവ്വഹണത്തിനായി എത്തുന്ന വ്യക്തിയാണെന്ന് അന്താരാഷ്ട്ര അതിർത്തി ഉദ്യോഗസ്ഥരെ ബോധ്യപ്പെടുത്താനാണ് ഈ പാസ്പോർട്ട് ഉപയോഗിക്കുന്നത്. ഇതിനുപുറമെ, മുതിർന്ന സർക്കാർ ഉദ്യോഗസ്ഥർക്കും നയതന്ത്ര പ്രതിനിധികൾക്കുമായി ചുവപ്പ് നിറത്തിലുള്ള ഡിപ്ലോമാറ്റിക് പാസ്പോർട്ടും രാജ്യം നൽകുന്നുണ്ട്.
എന്നാൽ, ഇത്തരം പ്രത്യേക പാസ്പോർട്ടുകൾ കൈവശമുണ്ടെന്നതുകൊണ്ട് യാത്രക്കാർക്ക് നിയമപരമായ പ്രത്യേക ആനുകൂല്യങ്ങളോ മുൻഗണനകളോ ലഭിക്കില്ലെന്ന് IRCC വ്യക്തമാക്കി. കാനഡയ്ക്ക് പുറത്തുള്ള സർക്കാർ ഓഫീസുകളിൽ ജോലി ചെയ്യുന്നവർക്കും ഔദ്യോഗിക കോൺഫറൻസുകളിൽ പങ്കെടുക്കുന്നവർക്കുമാണ് ഇത് പ്രധാനമായും ഉപകരിക്കുന്നത്.
