ഒട്ടാവ: കാനഡയുടെ പൗരത്വ നിയമത്തില്‍ വരുത്തിയ സുപ്രധാന ഭേദഗതികള്‍ പ്രാബല്യത്തില്‍ വന്നതോടെ, ദശലക്ഷക്കണക്കിന് അമേരിക്കന്‍ പൗരന്മാര്‍ക്ക് കനേഡിയന്‍ പാസ്പോര്‍ട്ട് സ്വന്തമാക്കാന്‍ വഴിതെളിഞ്ഞു. ഡിസംബര്‍ 15, 2025-ന് നിലവില്‍ വന്ന പുതിയ നിയമപ്രകാരം, കനേഡിയന്‍ പാരമ്പര്യമുള്ള വിദേശികള്‍ക്ക് പൗരത്വത്തിന് അപേക്ഷിക്കുന്നത് കൂടുതല്‍ ലളിതമാക്കി. മുന്‍പ് നിലനിന്നിരുന്ന ‘ഫസ്റ്റ് ജനറേഷന്‍ ലിമിറ്റ്’ എന്ന കര്‍ശന നിബന്ധന ഒഴിവാക്കിയതാണ് ഇതില്‍ നിര്‍ണ്ണായകമായത്. ഇതോടെ, കാനഡയ്ക്ക് പുറത്ത് ജനിച്ചവരാണെങ്കിലും മാതാപിതാക്കളോ അല്ലെങ്കില്‍ മുത്തശ്ശി-മുത്തശ്ശന്മാരോ കനേഡിയന്‍ പൗരന്മാരാണെങ്കില്‍ അവര്‍ക്കും ഇനി പൗരത്വം അവകാശപ്പെടാം.

പുതിയ നിയമം മൂലം അമേരിക്കയിലെ ന്യൂ ഇംഗ്ലണ്ട് മേഖലയിലുള്ള ഏകദേശം മൂന്ന് മില്യണ്‍ ആളുകള്‍ക്ക് കനേഡിയന്‍ പൗരത്വത്തിന് അര്‍ഹത ലഭിക്കുമെന്നാണ് കണക്കാക്കുന്നത്. 1870-നും 1930-നും ഇടയില്‍ കാനഡയില്‍ നിന്ന് അമേരിക്കയിലേക്ക് കുടിയേറിയവരുടെ പിന്‍ഗാമികള്‍ക്കാണ് ഇതിന്റെ പ്രധാന പ്രയോജനം ലഭിക്കുക. പൗരത്വത്തിനുള്ള തെളിവ് ലഭിച്ചുകഴിഞ്ഞാല്‍ ഇവര്‍ക്ക് കനേഡിയന്‍ പാസ്പോര്‍ട്ടിനായി അപേക്ഷിക്കാം. ഇരട്ട പൗരത്വം ലഭിക്കുന്നതിലൂടെ ഇവര്‍ക്ക് കാനഡയില്‍ സ്ഥിരതാമസമാക്കാനും വോട്ട് ചെയ്യാനുമുള്ള അവകാശങ്ങള്‍ ലഭിക്കും. കൂടാതെ, കാനഡയില്‍ താമസിക്കുന്നില്ലെങ്കില്‍ ഇവര്‍ക്ക് കാനഡയില്‍ ആദായനികുതി അടയ്ക്കേണ്ട ബാധ്യതയുമില്ല എന്നത് ശ്രദ്ധേയമാണ്.

2025 ഡിസംബര്‍ 15-ന് മുന്‍പ് ജനിച്ചവര്‍ക്കാണ് ഈ ഇളവുകള്‍ നേരിട്ട് ബാധകമാകുന്നത്. അതിനുശേഷം വിദേശത്ത് ജനിക്കുന്ന കുട്ടികള്‍ക്ക് പൗരത്വം ലഭിക്കണമെങ്കില്‍, അവരുടെ കനേഡിയന്‍ മാതാപിതാക്കള്‍ കുട്ടി ജനിക്കുന്നതിന് മുന്‍പ് കുറഞ്ഞത് 1,095 ദിവസങ്ങള്‍ (മൂന്ന് വര്‍ഷം) കാനഡയില്‍ താമസിച്ചിരിക്കണം എന്ന ‘സബ്സ്റ്റാന്‍ഷ്യല്‍ കണക്ഷന്‍’ ടെസ്റ്റ് പാസാകേണ്ടതുണ്ട്. പൗരത്വത്തിനുള്ള അപേക്ഷകള്‍ നിലവില്‍ ഓണ്‍ലൈനായി സമര്‍പ്പിക്കാവുന്നതാണ്. അപേക്ഷകള്‍ പ്രോസസ്സ് ചെയ്യാന്‍ ഏകദേശം 11 മാസത്തോളം സമയമെടുക്കുമെന്ന് അധികൃതര്‍ അറിയിച്ചു. പാരമ്പര്യമായി പൗരത്വം നിഷേധിക്കപ്പെട്ട ആയിരക്കണക്കിന് ‘ലോസ്റ്റ് കനേഡിയന്‍സിന്’ നീതി ഉറപ്പാക്കുന്നതാണ് ഈ ചരിത്രപരമായ നിയമ ഭേദഗതി.