കാൽഗറി നഗരത്തിൽ ശക്തമായ കൊടുങ്കാറ്റും മഞ്ഞുവീഴ്ചയും തുടരുന്നതിനാല് ഡ്രൈവർമാർ ജാഗ്രത പാലിക്കണമെന്ന് കാൽഗറി പൊലീസ് മുന്നറിയിപ്പ് നൽകി. മഞ്ഞുവീഴ്ചയ്ക്ക് ഒപ്പം ശക്തമായ കാറ്റ് വീശുന്നതോടെ വിസിബിലിറ്റി കുറയുകയും യാത്ര ദുഷ്കരമാകുകയും ചെയ്യുമെന്ന് കാലാവസ്ഥാ വകുപ്പ് അറിയിച്ചു. ഇതിനോടകം തന്നെ നിരവധി അപകടങ്ങൾ ഉണ്ടായതായും റോഡുകൾ അടച്ചിട്ടതായും പോലീസ് റിപ്പോർട്ട് ചെയ്തു.
ഒന്നിലധികം അപകടങ്ങളെ തുടർന്ന് കാൽഗറിക്കും എയർഡ്രിക്കും ഇടയിലുള്ള QEII ഹൈവേ (ഹൈവേ 2) നിലവിൽ ഇരു ദിശകളിലേക്കും അടച്ചിട്ടിരിക്കുകയാണ്. ഡ്രൈവർമാർ കാലാവസ്ഥയ്ക്ക് അനുസൃതമായി വാഹനമോടിക്കണമെന്നും ലൈറ്റുകൾ ഓണാക്കുകയും വേഗം കുറയ്ക്കുകയും സുരക്ഷിതമായ അകലം പാലിക്കണമെന്നും കാൽഗറി പോലീസ് നിർദ്ദേശിച്ചു.
