കാൽഗറി: കാനഡയിൽ വിറ്റഴിച്ച ഏകദേശം 20,000 പവർ ബാങ്കുകൾ തീപിടുത്തത്തിന് സാധ്യതയുണ്ടെന്ന് കണ്ടെത്തിയതിനെത്തുടർന്ന് ഹെൽത്ത് കാനഡ തിരിച്ചുവിളിക്കുന്നു. വാൻകൂവർ ആസ്ഥാനമായുള്ള ‘ലോജിക്സ്’ (LOGiiX) എന്ന കമ്പനി വിതരണം ചെയ്ത അഞ്ച് മോഡൽ പവർ ബാങ്കുകൾക്കാണ് നിലവിൽ വിലക്കേർപ്പെടുത്തിയിരിക്കുന്നത്. ഈ പവർ ബാങ്കുകൾ ചാർജ് ചെയ്യുമ്പോഴോ അല്ലെങ്കിൽ ഇവ ഉപയോഗിച്ച് മറ്റ് ഉപകരണങ്ങൾ ചാർജ് ചെയ്യുമ്പോഴോ അമിതമായി ചൂടാകുന്നു (Overheat) എന്ന് പരാതി ഉയർന്നതിനെത്തുടർന്നാണ് ഈ സുരക്ഷാ നടപടി.
‘LOGiiX Piston Power 5000 Mag’ എന്ന സീരീസിലെ അഞ്ച് വ്യത്യസ്ത നിറങ്ങളിലുള്ള മോഡലുകളാണ് (കറുപ്പ്, വെള്ള, നേവി ബ്ലൂ, ലാവെൻഡർ, ബ്ലഷ്) തിരിച്ചുവിളിച്ചിരിക്കുന്നത്. 2022 ജനുവരി മുതൽ 2025 ജൂലൈ വരെയുള്ള കാലയളവിൽ വിറ്റഴിച്ച ഉൽപ്പന്നങ്ങളാണിവ. ഇതുവരെ കാനഡയിൽ ഇത്തരത്തിലുള്ള നാല് അപകടങ്ങൾ റിപ്പോർട്ട് ചെയ്തിട്ടുണ്ട്. എന്നാൽ ആർക്കും പരിക്കേറ്റതായി വിവരമില്ല. അപകടസാധ്യത കണക്കിലെടുത്ത് ഈ പവർ ബാങ്കുകൾ ഉപയോഗിക്കുന്നത് ഉടൻ നിർത്തണമെന്നും പകരം സംവിധാനത്തിനായി കമ്പനിയുമായി ബന്ധപ്പെടണമെന്നും ഹെൽത്ത് കാനഡ ഉപഭോക്താക്കൾക്ക് നിർദ്ദേശം നൽകി.
ലിഥിയം അയൺ ബാറ്ററികൾ അടങ്ങിയ ഇത്തരം ഉപകരണങ്ങൾ സാധാരണ മാലിന്യങ്ങൾക്കൊപ്പം വലിച്ചെറിയരുതെന്നും മുൻസിപ്പാലിറ്റികളുടെ നിർദ്ദേശപ്രകാരം സുരക്ഷിതമായ രീതിയിൽ മാത്രം സംസ്കരിക്കണമെന്നും അധികൃതർ ഓർമ്മിപ്പിച്ചു. ചൈനയിൽ നിർമ്മിച്ച ഈ ഉൽപ്പന്നങ്ങൾ കാനഡയിലുടനീളം വൻതോതിൽ വിറ്റഴിക്കപ്പെട്ടിട്ടുണ്ട്. പവർ ബാങ്ക് ഉപയോഗിക്കുമ്പോൾ അസ്വാഭാവികമായ ചൂടോ മണമോ അനുഭവപ്പെടുകയാണെങ്കിൽ ജാഗ്രത പാലിക്കണമെന്നും റിപ്പോർട്ടിൽ പറയുന്നു. നിലവിൽ കൈവശമുള്ള പവർ ബാങ്കുകൾ തിരിച്ചുവിളിച്ചവയിൽ ഉൾപ്പെടുന്നുണ്ടോ എന്ന് ഉറപ്പുവരുത്താൻ കമ്പനിയുടെ വെബ്സൈറ്റ് സന്ദർശിക്കാവുന്നതാണ്.
