ഓട്ടവ : ഒക്ടോബറിലും വാർഷിക പണപ്പെരുപ്പ നിരക്ക് 3.1 ശതമാനമായി തുടരുന്നതായി സ്റ്റാറ്റിസ്റ്റിക്സ് കാനഡ അറിയിച്ചു. സെപ്റ്റംബറിലും ഇതേ നിരക്കായിരുന്നു രേഖപ്പെടുത്തിയിരുന്നത്. ഊർജ്ജ മേഖലയെ ഒഴിവാക്കിയാൽ, പണപ്പെരുപ്പ നിരക്ക് സെപ്റ്റംബറിലെ 2.1 ശതമാനത്തിൽ നിന്ന് ഒക്ടോബറിൽ 2 ശതമാനമായി അല്പം കുറഞ്ഞുവെന്നും ഏജൻസി വ്യക്തമാക്കി. ഇന്ധനവിലയിലെ വർധന കണക്കിലെടുത്ത് വാർഷിക പണപ്പെരുപ്പ നിരക്ക് 3.2 ശതമാനമായി ഉയരുമെന്ന് സാമ്പത്തിക വിദഗ്ധർ പ്രവചിച്ചിരുന്നു.
മധ്യപൂർവേഷ്യയിലും യുക്രെയ്നിലും തുടരുന്ന ഭൗമരാഷ്ട്രീയ സംഘർഷങ്ങൾക്കിടയിൽ, മൊത്തത്തിലുള്ള പണപ്പെരുപ്പത്തിന് പ്രധാന കാരണമായത് പെട്രോൾ വിലയിലെ വർധനവാണ്. മുൻ മാസത്തെ 27.8 ശതമാനത്തിൽ നിന്ന് ഒക്ടോബറിൽ പെട്രോൾ വില 30.9 ശതമാനമായി ഉയർന്നു.
പെട്രോൾ, പ്രകൃതിവാതകം, പലചരക്ക് സാധനങ്ങൾ, വസ്ത്രങ്ങൾ എന്നിവയുടെ വിലയിൽ വർധന രേഖപ്പെടുത്തിയതായി ഏജൻസി അറിയിച്ചു. മൊബൈൽ ഫോൺ പ്ലാനുകളുടെ നിരക്കിൽ കുറവുണ്ടായതായും സ്റ്റാറ്റിസ്റ്റിക്സ് കാനഡ റിപ്പോർട്ട് ചെയ്തു. ഒക്ടോബറിൽ പലചരക്ക് സാധനങ്ങളുടെ വിലയിൽ മുൻ വർഷത്തെ അപേക്ഷിച്ച് 2% വർധനവുണ്ടായതായി സ്റ്റാറ്റിസ്റ്റിക്സ് കാനഡ അറിയിച്ചു.








