ഒട്ടാവ: കാനഡയുടെ സാമ്പത്തിക നില മെച്ചപ്പെടുത്തുന്നതിനും തൊഴിൽ മേഖല ശക്തിപ്പെടുത്തുന്നതിനുമായി ‘ടീം കാനഡ സ്ട്രോങ്ങ്’ എന്ന പേരിൽ പുതിയ നൈപുണ്യ പരിശീലന പദ്ധതി പ്രഖ്യാപിച്ച് ലിബറൽ സർക്കാർ. പ്രധാനമന്ത്രിയുടെ പ്രത്യേക ഉപദേശകൻ മാർക്ക് കാർണി അവതരിപ്പിച്ച സ്പ്രിംഗ് ഇക്കണോമിക് അപ്‌ഡേറ്റിലാണ് ഈ സുപ്രധാന പ്രഖ്യാപനമുള്ളത്. അതേസമയം, രാജ്യത്തിന്റെ സാമ്പത്തിക കമ്മി 65.3 ബില്യൺ ഡോളറായി ഉയരുമെന്ന പ്രവചനം ഗൗരവകരമായ ചർച്ചകൾക്ക് വഴിവെച്ചിട്ടുണ്ട്.
പുതിയ പദ്ധതി പ്രകാരം അടുത്ത അഞ്ച് വർഷത്തിനുള്ളിൽ 5.9 ബില്യൺ ഡോളർ തൊഴിൽ പരിശീലനത്തിനായി സർക്കാർ ചിലവഴിക്കും. 2030-31 ഓടെ ഏകദേശം ഒരു ലക്ഷത്തോളം പുതിയ റെഡ് സീൽ വൈദഗ്ധ്യമുള്ള തൊഴിലാളികളെ സൃഷ്ടിക്കുകയാണ് ലക്ഷ്യം. യുവാക്കളിലെ തൊഴില്ലില്ലായ്മ പരിഹരിക്കാനും രാജ്യത്തെ ഭവന നിർമ്മാണം, പ്രതിരോധം, അടിസ്ഥാന സൗകര്യ വികസനം എന്നീ മേഖലകളിൽ വിദഗ്ധ തൊഴിലാളികളുടെ കുറവ് നികത്താനും ഈ നീക്കം സഹായിക്കുമെന്ന് സർക്കാർ കരുതുന്നു. പരിശീലന കാലയളവിൽ തൊഴിലാളികൾക്ക് വേതനം ഉറപ്പാക്കുന്നതോടൊപ്പം തൊഴിലുടമകൾക്ക് സബ്‌സിഡിയും വാഗ്ദാനം ചെയ്യുന്നുണ്ട്.
സാമ്പത്തിക കമ്മി വർദ്ധിക്കുന്നുണ്ടെങ്കിലും കാനഡയുടെ സമ്പദ്‌വ്യവസ്ഥ ശക്തമാണെന്നും ലോകത്തിലെ മാറുന്ന സാഹചര്യങ്ങൾക്കനുസരിച്ച് രാജ്യം സ്വയം സജ്ജമാകണമെന്നും റിപ്പോർട്ടിൽ വ്യക്തമാക്കുന്നു. ഇതിന്റെ ഭാഗമായി കാനഡ പെൻഷൻ പ്ലാൻ വിഹിതം 9.9 ശതമാനത്തിൽ നിന്ന് 9.5 ശതമാനമായി കുറച്ചു. ഇത് വഴി സാധാരണക്കാരായ ജീവനക്കാർക്ക് പ്രതിവർഷം ശരാശരി 133 ഡോളർ വരെ ലാഭിക്കാൻ സാധിക്കും. കൂടാതെ വിമാനയാത്രക്കാരുടെ പരാതികൾ വേഗത്തിൽ തീർപ്പാക്കാനുള്ള പുതിയ സംവിധാനവും സീസണൽ തൊഴിലാളികൾക്കുള്ള ഇൻഷുറൻസ് ആനുകൂല്യങ്ങൾ 2028 വരെ നീട്ടിയതും റിപ്പോർട്ടിലെ ശ്രദ്ധേയമായ കാര്യങ്ങളാണ്.
കായിക രംഗത്തെ പ്രോത്സാഹിപ്പിക്കുന്നതിനായി 755 മില്യൺ ഡോളറിന്റെ പ്രത്യേക നിക്ഷേപവും സർക്കാർ പ്രഖ്യാപിച്ചിട്ടുണ്ട്. തദ്ദേശീയ സമൂഹങ്ങളുടെ ആരോഗ്യ സംരക്ഷണത്തിനായി 794 മില്യൺ ഡോളറും വകയിരുത്തി. എന്നാൽ, പലചരക്ക് സാധനങ്ങളുടെയും ഇന്ധനത്തിന്റെയും വിലക്കയറ്റം മൂലം കഷ്ടപ്പെടുന്ന ജനങ്ങൾക്ക് ഈ റിപ്പോർട്ട് വലിയ ആശ്വാസമൊന്നും നൽകുന്നില്ലെന്ന് നികുതി വിദഗ്ധർ വിമർശിക്കുന്നുണ്ട്. വരാനിരിക്കുന്ന ഫെഡറൽ ബജറ്റിൽ ഈ നിർദ്ദേശങ്ങൾ എപ്രകാരം നടപ്പിലാക്കുമെന്നാണ് ഇപ്പോൾ സാമ്പത്തിക ലോകം ഉറ്റുനോക്കുന്നത്.
