കാനഡയിൽ സ്ഥിര താമസക്കാരാകാൻ ഹോം കെയർ വർക്കേഴ്‌സിനെ സഹായിക്കുന്ന പുതിയ ഇമിഗ്രേഷൻ പ്രോഗ്രാമുകൾ പ്രഖ്യാപിച്ച് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC). കാനഡയിൽ നിലവിൽ ജോലി ചെയ്യുന്ന ഹോം കെയർ വർക്കേഴ്‌സിന് സഹായകമാകുന്നതും മറ്റൊന്ന് നിലവിൽ കാനഡയിൽ ജോലി ചെയ്യാത്തവർക്ക് വേണ്ടിയുള്ളതുമായ രണ്ട് പ്രോഗ്രാമുകൾ ആണ് ഐആസിസി അവതരിപ്പിച്ചത്. നിലവിൽ കാനഡയിൽ ജോലി ചെയ്യുന്ന ഹോം കെയർ വർക്കേഴ്‌സിൽ നിന്നുള്ള അപേക്ഷകൾ ആയിരിക്കും സ്വീകരിക്കുക. കാനഡയ്ക്ക് പുറത്തുള്ള അപേക്ഷകർക്കുള്ള രണ്ടാമത്തെ പ്രോഗ്രാം പിന്നീട് ആരംഭിക്കും.
പുതിയ പ്രോഗ്രാമിലൂടെ ഹോം കെയർ വർക്കേഴ്‌സിനും അവരുടെ കുടുംബാഗങ്ങൾക്കും സ്ഥിര താമസത്തിനായി നേരിട്ട് അപേക്ഷിക്കാം. അതേസമയം ഐആർസിസി ഇവർക്കുളള ഭാഷാ, വിദ്യാഭ്യാസ യോഗ്യത മാനദണ്ഡങ്ങളിൽ ഇളവ് വരുത്തിയിട്ടുണ്ട്. എന്നാൽ, കനേഡിയൻ ലാംഗ്വേജ് ബെഞ്ച്മാർക്ക്സ് (CLB) അല്ലെങ്കിൽ Niveaux de Compétence linguistique canadiens (NCLC) എന്നിവയിൽ ലെവൽ 4 ഉം കൂടാതെ ഹൈസ്കൂൾ ഡിപ്ലോമയും ആവശ്യമാണ്. അപേക്ഷകർക്ക് മുൻ കനേഡിയൻ പ്രവൃത്തി പരിചയം ആവശ്യമില്ല. എന്നാൽ അവർ സമീപകാലത്ത് ജോലി ചെയ്തവരും പ്രവൃത്തി പരിചയം ഉള്ളവരും ആയിരിക്കണം. അല്ലെങ്കിൽ കുറഞ്ഞത് 6 മാസത്തെ അനുബന്ധ ഹോം കെയർ പരിശീലന യോഗ്യത പൂർത്തിയാക്കിയിരിക്കണം. കെബെക്കിന് പുറത്തുള്ള കനേഡിയൻ തൊഴിലുടമയിൽ നിന്ന് ഫുൾ ടൈം ജോബ് ഓഫറും ഉണ്ടായിരിക്കണം. സ്വകാര്യ കുടുംബങ്ങൾ, ഹോം ഹെൽത്ത് കെയർ സേവന ദാതാക്കൾ, ഹോം കെയർ സപ്പോർട്ട് സേവന ദാതാക്കൾ, നേരിട്ടുള്ള പരിചരണ ഏജൻസികൾ, റെസിഡൻഷ്യൽ ക്രമീകരണങ്ങളിലെ വ്യക്തിഗത പരിചരണ സേവനങ്ങൾ, പീഡിയാട്രിക് ഹോം ഹെൽത്ത് കെയർ സേവന ദാതാക്കൾ അല്ലെങ്കിൽ ദൈനംദിന ജീവിത പ്രവർത്തനങ്ങൾക്ക് സഹായം ആവശ്യമുള്ളവരിൽ നിന്നോ പരുക്കിൽ നിന്നോ രോഗത്തിൽ നിന്നോ സുഖം പ്രാപിക്കുന്നവരിൽ നിന്നോ ജോബ് ഓഫർ സ്വീകരിക്കാവുന്നതാണ്.
