കാനഡയിൽ ജീവിക്കാൻ ഏറ്റവും മികച്ച നഗരങ്ങളുടെ പട്ടികയിൽ കാൽഗറി ഒന്നാം സ്ഥാനം സ്വന്തമാക്കി. മിതമായ ജീവിതച്ചെലവ്, ഉയർന്ന ജീവിതനിലവാരം, വിപുലമായ തൊഴിലവസരങ്ങൾ എന്നിവയാണ് കാൽഗറിയെ രാജ്യത്തെ മറ്റ് പ്രമുഖ മെട്രോപൊളിറ്റൻ നഗരങ്ങളെക്കാൾ മുന്നിലെത്തിച്ചത്. അന്താരാഷ്ട്ര കൺസൾട്ടൻസി ഏജൻസിയായ ‘ഗ്ലോബൽ സിറ്റിസൺ സൊല്യൂഷൻസ്’ പുറത്തുവിട്ട റിപ്പോർട്ടിൽ രാജ്യതലസ്ഥാനമായ ഓട്ടവ രണ്ടാം സ്ഥാനവും എഡ്മിന്‍റൻ മൂന്നാം സ്ഥാനവും കരസ്ഥമാക്കി. വിദേശ കുടിയേറ്റക്കാർക്ക് എളുപ്പത്തിൽ ഇണങ്ങിച്ചേരാൻ സാധിക്കുന്ന സൗഹൃദപരമായ അന്തരീക്ഷമാണ് നഗരത്തിനുള്ളതെന്നും റിപ്പോർട്ടിൽ പറയുന്നു.

നിലവിൽ കാൽഗറിയിലെ ശരാശരി വാർഷിക വേതനം 63,700 കനേഡിയൻ ഡോളറാണ്. വാടക ഒഴികെയുള്ള ഒരു വ്യക്തിയുടെ ശരാശരി പ്രതിമാസ ജീവിതച്ചെലവ് 1,508 ഡോളറും ശരാശരി ഭവനവില 665,695 ഡോളറുമാണ്. ഉന്നത നിലവാരത്തിലുള്ള ആരോഗ്യപരിപാലന സംവിധാനം, കുറഞ്ഞ കുറ്റകൃത്യ നിരക്ക്, കുറഞ്ഞ നികുതി ഘടന എന്നിവയും കാൽഗറിയുടെ ജനപ്രീതിക്ക് കാരണമാകുന്നു. റോക്കി പർവതനിരകളോടുള്ള സാമീപ്യവും ഹൈക്കിംഗ്, സ്നോബോർഡിംഗ്, സ്കീയിംഗ് തുടങ്ങിയ ശീതകാല വിനോദങ്ങൾക്കുള്ള എളുപ്പത്തിലുള്ള ലഭ്യതയും നഗരത്തിലേക്ക് ജനങ്ങളെ ആകർഷിക്കുന്നു.