സിറ്റി ഹാളിൽ മറ്റ് രാജ്യങ്ങളുടെ പതാകകൾ ഉയർത്തുന്നത് നിർത്തലാക്കാനുള്ള അടിയന്തര പ്രമേയം തള്ളി കാൽഗറി സിറ്റി കൗൺസിൽ. കൗൺസിലർ ഡാൻ മക്ലീൻ അവതരിപ്പിച്ച പ്രമേയം 8–7 വോട്ടിന് പരാജയപ്പെട്ടു. അതേസമയം, അടിയന്തര പ്രമേയം പരാജയപ്പെട്ടെങ്കിലും, അടുത്ത മാസം നടക്കുന്ന പതിവ് കമ്മിറ്റി പ്രക്രിയയിലൂടെ വിഷയം പുനഃപരിശോധിക്കുമെന്ന് മേയർ ഫാർക്കസ് സ്ഥിരീകരിച്ചു. അതുവരെ, നിലവിലുള്ള നിയമങ്ങൾക്കനുസൃതമായി മറ്റ് രാജ്യങ്ങളുടെ പതാകകൾ സിറ്റി ഹാളിൽ ഉയർത്തുന്നത് തുടരുമെന്നും മേയർ പറഞ്ഞു.

ഈ വിഷയം അടിയന്തര പ്രാധാന്യമുള്ളതല്ലെന്ന് ചില കൗൺസിലർമാർ വാദിച്ചു. കാൽഗറി സിറ്റി ഹാളിൽ പലസ്തീൻ പതാക ഉയർന്നതിന് തൊട്ടുപിന്നാലെയാണ് പ്രമേയം അവതരിപ്പിച്ചതെന്നത് അവർ ചൂണ്ടിക്കാട്ടി. വിദേശ രാജ്യങ്ങളുടെ പതാകകൾ ഉയർത്തുന്നത് സമൂഹത്തിൽ “വിഭാഗീയത” സൃഷ്ടിക്കുന്നുവെന്ന് വാദിച്ചുകൊണ്ട് മേയർ ജെറോമി ഫാർക്കസ് കഴിഞ്ഞ ആഴ്ച ആശങ്ക ഉന്നയിച്ചിരുന്നു.