കാൽഗറി: ഒക്ടോബർ 20ന് നടക്കുന്ന കാൽഗറി മുനിസിപ്പൽ തെരഞ്ഞെടുപ്പിൽ വോട്ടർ പട്ടികയിൽ പേര് ചേർത്തിട്ടുണ്ടോ എന്നത് ഉറപ്പാക്കണമെന്ന് പൊതുജനങ്ങൾക്ക് നിർദ്ദേശം നൽകി സിറ്റി നോട്ടീസ് പുറത്തിറക്കി. വോട്ടർമാർക്ക് പേരുകൾ രജിസ്റ്റർ ചെയ്തിട്ടുണ്ടോയെന്ന് പരിശോധിക്കാനും രജിസ്റ്റർ ചെയ്യുന്നതിനും വിവരങ്ങൾ നൽകാനും https://www.voterlink.ab.ca/ എന്ന വെബ്‌സൈറ്റ് സന്ദർശിക്കാവുന്നതാണെന്ന് സിറ്റി അറിയിച്ചു.
അതേസമയം, ആൽബെർട്ട സർക്കാർ നടപ്പിലാക്കിയ മാറ്റത്തെ തുടർന്ന് പ്രവിശ്യാ സർക്കാരിൽ നിന്നും സിറ്റിയിൽ നിന്നുമുള്ള ആശയവിനിമയത്തിൽ പരാജയം ഉണ്ടായിട്ടുണ്ടെന്ന് കാൽഗറി പാർട്ടി മേയർ സ്ഥാനാർത്ഥി ബ്രയാൻ തീസെൻ ഈ വിഷയത്തിൽ അഭിപ്രായപ്പെട്ടു. പുതിയ നിയമപ്രകാരം, വോട്ടുചെയ്യാൻ അർഹതയുള്ള താമസക്കാരുടെ സ്ഥിരം വോട്ടർ രജിസ്റ്റർ തയാറാക്കി പരിപാലിക്കാൻ മുനിസിപ്പിലാറ്റികൾ ബാധ്യസ്ഥരാണ്.
പേര് രജിസ്റ്റർ ചെയ്യാനുള്ള അവസാന തീയതി ഓഗസ്റ്റ് 26 ആണ്. എന്നാൽ അതിനുശേഷം വോട്ടെടുപ്പ് ദിവസം ആളുകൾ പോളിംഗിൽ രജിസ്റ്റർ ചെയ്യേണ്ടതുണ്ട്. ഇത് നീണ്ട നിരകൾക്ക് കാരണമാകുമെന്ന് തീസെൻ പറഞ്ഞു. എന്നാൽ വോട്ടർ രജിസ്റ്ററിൽ പേരില്ലെങ്കിൽ പോലും അർഹരായ വോട്ടർമാർക്ക് വോട്ട് രേഖപ്പെടുത്താൻ സാധിക്കുമെന്ന് സിറ്റി പ്രസ്താവനയിൽ വ്യക്തമാക്കി.
