ഒൻ്റാരിയോയിൽ വലിയ വിവാദമുണ്ടാക്കിയ ‘ബ്ലൂ ലൈസൻസ് പ്ലേറ്റ്’ പദ്ധതിയുമായി ബന്ധപ്പെട്ട രേഖകൾ പൊതുജനങ്ങൾക്ക് ലഭ്യമാക്കണമെന്ന ഉത്തരവിനെതിരെ കോടതിയെ സമീപിച്ച് പ്രവിശ്യാ സർക്കാർ. വിവരവകാശ നിയമപ്രകാരം കനേഡിയൻ പ്രസ്സ് നൽകിയ അപേക്ഷയിൽ, രേഖകൾ പരസ്യപ്പെടുത്തണമെന്ന് ഒൻ്റാരിയോ ഇൻഫർമേഷൻ ആൻഡ് പ്രൈവസി കമ്മീഷണർ (IPC) ഉത്തരവിട്ടിരുന്നു. ഇതിനെതിരെയാണ് പ്രവിശ്യാ സർക്കാർ ഇപ്പോൾ ജുഡീഷ്യൽ റിവ്യൂ ഹർജി നൽകിയിരിക്കുന്നത്. പൊതുജനങ്ങൾക്ക് സർക്കാർ രേഖകൾ ലഭ്യമാകുന്നതിനെതിരെ അടുത്തിടെ കൊണ്ടുവന്ന നിയന്ത്രണങ്ങളുടെ തുടർച്ചയാണ് ഈ നിയമപോരാട്ടമെന്നും, സുതാര്യത ഉറപ്പാക്കുന്നതിൽ സർക്കാർ പരാജയപ്പെട്ടെന്നും പ്രതിപക്ഷ നേതാക്കൾ കുറ്റപ്പെടുത്തി.
ഭരണകക്ഷിയായ പ്രോഗ്രസീവ് കൺസർവേറ്റീവ് പാർട്ടി ഓഫ് ഒൻ്റാരിയോയുടെ ബ്രാൻഡിങ് നിറങ്ങളോട് സാമ്യമുള്ള നീല ലൈസൻസ് പ്ലേറ്റുകൾ 2020-ന്റെ തുടക്കത്തിലാണ് പ്രവിശ്യയിൽ പുറത്തിറക്കിയത്. രാത്രികാലങ്ങളിൽ ഈ പ്ലേറ്റുകളിലെ നമ്പറുകൾ വായിക്കാൻ കഴിയില്ലെന്ന് പൊലീസ് ഉദ്യോഗസ്ഥർ തന്നെ കണ്ടെത്തിയതോടെ ഇവ വിതരണം ചെയ്യുന്നത് സർക്കാർ നിർത്തിവെച്ചിരുന്നു. എന്നാൽ അപ്പോഴേക്കും രണ്ട് ലക്ഷത്തോളം പ്ലേറ്റുകൾ നിരത്തിലിറങ്ങിയിരുന്നു. ഇവ എങ്ങനെ തിരിച്ചുവിളിക്കുമെന്നതിനെക്കുറിച്ചുള്ള പദ്ധതികൾ അറിയാൻ 2022-ൽ കനേഡിയൻ പ്രസ്സ് വിവരവകാശ പ്രകാരം അപേക്ഷ നൽകിയെങ്കിലും, ഉദ്യോഗസ്ഥരുടെ രഹസ്യ ഉപദേശങ്ങളും നയപരമായ കാര്യങ്ങളുമാണ് ഇതിലുള്ളതെന്ന് കാണിച്ച് സർക്കാർ അനുമതി നിഷേധിക്കുകയായിരുന്നു.
തുടർന്ന് അപ്പീലിൽ കമ്മീഷണർ ഇടപെടുകയും, ഈ രേഖകൾ അറിയാൻ പൊതുജനങ്ങൾക്ക് അവകാശമുണ്ടെന്ന് വ്യക്തമാക്കി രേഖകൾ പുറത്തുവിടാൻ ഉത്തരവിടുകയുമായിരുന്നു. തകരാറിലായ പ്ലേറ്റുകൾ സ്വാഭാവികമായ തേയ്മാനത്തിലൂടെ റോഡുകളിൽ നിന്ന് ഇല്ലാതാകുന്നതുവരെ കാത്തിരിക്കാനാണ് തങ്ങളുടെ പദ്ധതിയെന്ന് 2024-ൽ സർക്കാർ വ്യക്തമാക്കിയെങ്കിലും, ഇതിനായി പരിഗണിച്ച മറ്റ് വഴികളും അവയുടെ ചെലവുകളും ജനങ്ങൾ അറിയേണ്ടതുണ്ടെന്നാണ് കമ്മീഷണറുടെ ഓഫീസ് വ്യക്തമാക്കിയത്. കമ്മീഷണറുടെ ഉത്തരവിനെതിരെ സർക്കാർ നൽകിയ പുനഃപരിശോധനാ ഹർജിയും തള്ളിയതോടെയാണ് പ്രവിശ്യാ സർക്കാർ കോടതിയെ സമീപിച്ചത്. എന്നാൽ സത്യം മൂടിവെക്കാൻ സർക്കാർ ജനങ്ങളുടെ നികുതിപ്പണം കോടതിയിൽ ദുരുപയോഗം ചെയ്യുകയാണെന്ന് ലിബറൽ, എൻ.ഡി.പി നേതാക്കൾ ആരോപിച്ചു.
