ഒട്ടാവ: ഇന്ത്യയും പാക്കിസ്ഥാനും തമ്മിൽ നടക്കുന്ന സംഘർഷങ്ങളുടെ പശ്ചാത്തലത്തിൽ ഇരുരാജ്യങ്ങളിലേക്കുമുള്ള യാത്ര ഒഴിവാക്കണമെന്ന് കനേഡിയൻ പൗരന്മാർക്ക് ഫെഡറൽ സർക്കാർ യാത്രാ മുന്നറിയിപ്പ് നൽകി. ഇരുരാജ്യങ്ങളും തമ്മിലുള്ള സൈനിക നടപടികളും പ്രാദേശിക സംഘർഷവും രൂക്ഷമായ സാഹചര്യത്തിൽ സുരക്ഷ അപകടത്തിലാകുമെന്ന് ചൂണ്ടിക്കാട്ടിയാണ് മുന്നറിയിപ്പ്. ഇരുരാജ്യങ്ങളിലുമുള്ള കനേഡിയൻ പൗരന്മാർ ജാഗ്രത പാലിക്കണമെന്നും നിർദ്ദേശമുണ്ട്.
പാക്കിസ്ഥാനിൽ പ്രവചനാതീതമായ അപകടങ്ങളാണ് നിലനിൽക്കുന്നത്. തീവ്രവാദ ഭീഷണി, ആഭ്യന്തര കലാപം, വിഭാഗീയ അക്രമം, തട്ടിക്കൊണ്ടുപോകൽ എന്നിവ നിലനിൽക്കുന്നതിനാൽ അധികൃതർ മുന്നറിയിപ്പ് നൽകുന്നു. ജമ്മുകശ്മീരിലെ കേന്ദ്രഭരണ പ്രദേശത്തേക്കുള്ള എല്ലാ യാത്രകളും ഒഴിവാക്കണമെന്നാണ് നിർദ്ദേശം. കൂടാതെ, ഗുജറാത്ത്, പഞ്ചാബ്, രാജസ്ഥാൻ സംസ്ഥാനങ്ങളിലെ ഇന്ത്യ-പാക്കിസ്ഥാൻ അതിർത്തിയുടെ 10 കിലോമീറ്ററിനുള്ളിൽ എല്ലാ യാത്രകളും ഒഴിവാക്കണമെന്നും നിർദ്ദേശമുണ്ട്.
