ടൊറൻ്റോ: സോഷ്യൽ മീഡിയയിൽ പരിചയപ്പെട്ട പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച യുവാവിനെ അറസ്റ്റ് ചെയ്തതായി ദുർഹം റീജനൽ പൊലീസ്. 14 വയസ്സുള്ള പെൺകുട്ടിയാണ് അക്രമത്തിനിരയായത്. പെൺകുട്ടിയെ മനുഷ്യക്കടത്തിനായി പരിശീലിപ്പിക്കുന്നുണ്ടെന്ന് കണ്ടെത്തിയതിനെത്തുടർന്ന് ഫെബ്രുവരി ഏഴിനാണ് പൊലീസ് അന്വേഷണം ആരംഭിച്ചത്.

സമൂഹ മാധ്യമത്തിൽ ‘ഏസ്’ എന്ന പേരിൽ 18 വയസ്സുള്ള പുരുഷനായി നടിച്ച പ്രതി, പെൺകുട്ടിയുടെ പ്രായം അറിഞ്ഞിട്ടും അവരുമായി ബന്ധം തുടരുകയായിരുന്നു. തനിക്ക് 14 വയസ്സ് മാത്രമേയുള്ളൂവെന്ന് പെൺകുട്ടി പലതവണ പറഞ്ഞിരുന്നതായി പൊലീസ് കണ്ടെത്തി. ഇരുവരും പലതവണ നേരിട്ട് കണ്ടതായും അധികൃതർ പറയുന്നു.

ഫെബ്രുവരി 12-ന് സ്കാർബ്റോ ബ്രിംലി റോഡിലുള്ള ഒരു വസതിയിൽ ഉദ്യോഗസ്ഥർ തിരച്ചിൽ നടത്തിയാണ് കേസിലെ പ്രതിയെന്ന് സംശയിക്കപ്പെടുന്ന ഇരുപത്തിയൊന്ന് വയസ്സുള്ള ഹമ്മദ് അബോവത്തിനെ അറസ്റ്റ് ചെയ്തത്. ഇയാൾക്കെതിരെ പ്രായപൂർത്തിയാകാത്ത പെൺകുട്ടിയെ ലൈംഗികമായി സ്പർശിച്ചതിനും ലൈംഗിക ഇടപെടലിനും കേസെടുത്തു.