മോൺട്രിയലിലെ സെന്റ്-ലോറന്റ് ബറോയിലുള്ള നോർഗേറ്റ് അപ്പാർട്ട്മെന്റുകളിൽ അപ്പാർട്ട്മെന്റുകളുടെ നവീകരണ ജോലികളെച്ചൊല്ലി ഉടമകളും വാടകക്കാരും തമ്മിലുള്ള തർക്കം രൂക്ഷമാകുന്നു. സെൻട്രൽ ഗ്യാസ് ഹീറ്റിങ് സിസ്റ്റം മാറ്റി വൈദ്യുതിയിലുള്ള സംവിധാനമാക്കാൻ പുതിയ ഉടമകൾ തീരുമാനിച്ചതിനെ തുടർന്നാണ് ഇവിടെ പ്രശ്നങ്ങൾ ആരംഭിച്ചത്. ഇത് വാടകക്കാരുടെ കരാർ വ്യവസ്ഥകളെ ബാധിക്കുമെന്നും ഭാവിയിൽ തങ്ങൾക്ക് താങ്ങാനാവാത്ത വൈദ്യുതി ബിൽ വരുമെന്നും ചൂണ്ടിക്കാട്ടി ഒരു വിഭാഗം വാടകക്കാർ ജോലികൾ തടസ്സപ്പെടുത്തുകയാണ്.
കെട്ടിടങ്ങളുടെ പുതിയ ഉടമകളായ ‘നോർഗേറ്റ് ക്യുബെക് ഇങ്ക്’ (Norgate Québec Inc.) പറയുന്നതനുസരിച്ച്, നിലവിലുള്ള ചൂടുവെള്ളം, ഹീറ്റിങ് സിസ്റ്റങ്ങൾ കാലഹരണപ്പെട്ടതാണെന്നും അവ മാറ്റേണ്ടതുണ്ടെന്നുമാണ്. എന്നാൽ വാടകയ്‌ക്കൊപ്പം ഹീറ്റിങ്, ചൂടുവെള്ള ചെലവുകൾ കൂടി വഹിക്കുന്ന നിലവിലെ കരാർ വ്യവസ്ഥ മാറ്റാനാണ് ഉടമകൾ ശ്രമിക്കുന്നതെന്ന് വാടകക്കാരുടെ അവകാശങ്ങൾക്കായി പ്രവർത്തിക്കുന്ന ‘കൊമിതെ ലോഗ്മെന്റ് സെന്റ്-ലോറന്റ്’ (Comité logement Saint-Laurent) ആരോപിക്കുന്നു. ഈ മാറ്റങ്ങൾ വരുമ്പോൾ വൈദ്യുതി ബിൽ തുക തങ്ങൾ തന്നെ അടക്കേണ്ടി വരുമെന്ന ആശങ്കയിലാണ് വാടകക്കാർ.
പണികൾ അനുവദിക്കാത്ത വാടകക്കാർക്ക് ദിവസേന 500 ഡോളർ പിഴ ഈടാക്കുമെന്ന് ഭീഷണിപ്പെടുത്തുന്നതായും ചിലർക്ക് ചൂടുവെള്ളവും തപീകരണവും നഷ്ടപ്പെട്ടതായും വാടകക്കാർ പരാതിപ്പെടുന്നു. എന്നാൽ വാടകക്കാരെ ഭീഷണിപ്പെടുത്തിയിട്ടില്ലെന്നും പഴയ സംവിധാനങ്ങൾ മാറ്റാൻ ക്യുബെക്കിന്റെ ഹൗസിങ് ബോർഡിന്റെ (TAL) അനുമതി ആവശ്യമില്ലെന്നുമാണ് മാനേജ്മെന്റ് കമ്പനിയുടെ വാദം. ഈ നിയമപരമായ തർക്കങ്ങൾക്കിടയിൽ എന്തു ചെയ്യണമെന്നറിയാതെ ആശങ്കയിലാണ് പ്രദേശത്തെ വാടകക്കാർ.
