ഓട്ടവ : ‘കാനഡ സ്ട്രോങ്ങ് ഫണ്ട്’ (Canada Strong Fund)-ന്‍റെ പ്രഥമ ചീഫ് എക്സിക്യൂട്ടീവ് ഓഫീസറായി കാരെൻ കാർനിയോൾ-ടാംബൂർ ചുമതലയേൽക്കുമെന്ന് പ്രധാനമന്ത്രി മാർക്ക് കാർണി പ്രഖ്യാപിച്ചു. രാജ്യത്തിന്‍റെ സാമ്പത്തിക വളർച്ച ലക്ഷ്യമിട്ട് നടപ്പിലാക്കുന്ന ‘സോവറീൻ വെൽത്ത് ഫണ്ട്’ പദ്ധതിയുടെ ഭാഗമാണ് ഈ പ്രഖ്യാപനം. ആഗോള സാമ്പത്തിക രംഗത്ത് പരിചയസമ്പത്തുള്ള പ്രമുഖയാണ് കാരെൻ കാർനിയോൾ. ലോകത്തിലെ ഏറ്റവും വലിയ അസറ്റ് മാനേജ്‌മെൻ്റ് സ്ഥാപനങ്ങളിലൊന്നായ, ‘ബ്രിഡ്ജ്‌വാട്ടർ അസോസിയേറ്റ്‌സി’ലെ (Bridgewater Associates) സഹ-ചീഫ് ഇൻവെസ്റ്റ്‌മെൻ്റ് ഓഫീസറാണ് കാരെൻ.

സർക്കാർ ഇടപെടലുകൾ ഒഴിവാക്കി, കാരെൻ കാർനിയോൾ-ടാംബൂറിന്‍റെ നേതൃത്വത്തിലുള്ള ഡയറക്ടർ ബോർഡിന് കീഴിലായിരിക്കും കാനഡ സ്ട്രോങ് ഫണ്ട് പ്രവർത്തിക്കുക. 25 ബില്യൺ ഡോളർ മൂലധനത്തോടെയാണ് കാനഡ സ്ട്രോങ് ഫണ്ട് പ്രവർത്തനം ആരംഭിക്കുന്നത്. രാജ്യത്തിന്‍റെ സമ്പദ്‌വ്യവസ്ഥയെ കൂടുതൽ ശക്തമാക്കാൻ പ്രധാന വികസന പദ്ധതികൾക്ക് പണം നൽകുന്ന വിവിധ ഫെഡറൽ സ്ഥാപനങ്ങളുമായി കാനഡ സ്ട്രോങ്ങ് ഫണ്ട് പ്രവർത്തിക്കും. ഒപ്പം സാമ്പത്തികമായി വളർച്ച നേടാൻ സാധ്യതയുള്ള മറ്റ് വലിയ കമ്പനികളിലും നിക്ഷേപം നടത്തും.