ആന്ധ്രാപ്രദേശിലെ അനന്തപൂർ ജില്ലയിലുള്ള രാപ്താടുവിലെ ജില്ലാ പരിഷത്ത് സ്കൂളിൽ പത്താം ക്ലാസ് വിദ്യാർഥിനിക്ക് (15) നേരെ മെഷീൻ ഉപയോഗിച്ചുള്ള വാൾ (ചെയിൻസോ) കൊണ്ട് ആക്രമണം. വെള്ളിയാഴ്ച ക്ലാസ് മുറിയിൽ കയറിയാണ് ആക്രമണം നടത്തിയത്.
സംഭവവുമായി ബന്ധപ്പെട്ട് സംശയമുള്ളയാളെ പൊലീസ് കസ്റ്റഡിയിലെടുത്തു. പ്രാഥമിക അന്വേഷണത്തിൽ ഇയാൾ പെൺകുട്ടിയുടെ ബന്ധുവാണെന്ന് കണ്ടെത്തി. സ്കൂളിൽ അറ്റകുറ്റപ്പണികൾ നടക്കുന്നുണ്ടായിരുന്നതിനാൽ ഇയാളെ തൊഴിലാളിയാണെന്ന് കരുതി അധ്യാപകരും സുരക്ഷാ ജീവനക്കാരും അകത്തേക്ക് കടത്തിവിടുകയായിരുന്നുവെന്ന് പൊലീസ് പറഞ്ഞു.
ആക്രമണത്തിൽ പെൺകുട്ടിയുടെ കഴുത്തിലും വയറിലും ആഴത്തിൽ മുറിവേൽക്കുകയും വലതുകൈ ഏതാണ്ട് വേർപെട്ട നിലയിലാകുകയും ചെയ്തു. തടയാൻ ശ്രമിച്ച മറ്റൊരു പെൺകുട്ടിക്കും ഗുരുതരമായി പരിക്കേറ്റു. നിലവിൽ ഇരുവർക്കും സ്വകാര്യ ആശുപത്രിയിൽ തീവ്രപരിചരണം നൽകിവരികയാണ്.
