ഒക്ടോബറിലെ മൂന്നാമത്തെ എക്സ്പ്രസ് എൻട്രി നറുക്കെടുപ്പിൽ 2,500 ഉദ്യോഗാർത്ഥികൾക്ക് സ്ഥിര താമസത്തിനായി (permanent residence) അപേക്ഷിക്കാൻ ഇൻവിറ്റേഷൻ നൽകി ഐആർസിസി. ഒക്ടോബർ 15-ന് നടന്ന ഈ നറുക്കെടുപ്പിൽ ‘കനേഡിയൻ എക്സ്പീരിയൻസ് ക്ലാസ്’ (Canadian Experience Class) വിഭാഗത്തിൽപ്പെട്ട അപേക്ഷകരെയാണ് പരിഗണിച്ചത്. കൂടാതെ കോംപ്രിഹെൻസീവ് റാങ്കിങ് സിസ്റ്റം’ (CRS) സ്കോർ 519 ഉള്ള ഉദ്യോഗാർത്ഥികൾക്കാണ് ഐആർസിസി ഈ നറുക്കെടുപ്പിലൂടെ ഇൻവിറ്റേഷൻ നൽകിയത്.
കാനഡയിൽ കുറഞ്ഞത് ഒരു വർഷത്തെ പ്രവൃത്തിപരിചയമുള്ള ഉദ്യോഗാർത്ഥികൾക്കാണ് കനേഡിയൻ എക്സ്പീരിയൻസ് ക്ലാസ് സ്ട്രീം വഴി അവസരം ലഭിക്കുന്നത്. പിആർ (PR) പ്രൊസസിങ് നടപടികൾക്കായി ITA ലഭിച്ച ഉദ്യോഗാർത്ഥികൾ നിർദ്ദിഷ്ട സമയപരിധിക്കുള്ളിൽ ആവശ്യമായ രേഖകൾ സമർപ്പിക്കണം. ഈ വർഷം കാനഡ നടത്തുന്ന 61-ാമത് എക്സ്പ്രസ് എൻട്രി നറുക്കെടുപ്പായിരുന്നു ഇത്. ഈ നറുക്കെടുപ്പുകളിലൂടെ ഐആർസിസി ആകെ 138,467 ITA-കൾ നൽകിയിട്ടുണ്ട്.
