വിഖ്യാത ബോളിവുഡ് നടൻ നാനാ പടേക്കർ (75) അന്തരിച്ചു. ഗോവയിലെ ഡോണ പൗളയിലുള്ള വസതിയിൽ ഹൃദയാഘാതത്തെ തുടർന്നായിരുന്നു അന്ത്യം. ഇന്നു പുലർച്ചെ വീടിനുള്ളിൽ അബോധാവസ്ഥയിൽ കണ്ടെത്തിയ അദ്ദേഹത്തെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. 1951 ജനുവരി 1 ന് മഹാരാഷ്ട്രയിലെ റായ്ഗഡ് ജില്ലയിലാണ് ജനനം. വിശ്വനാഥ് പടേക്കർ എന്നാണ് യഥാർഥ പേര്. നീലകണ്ഠി പടേക്കറാണ് ഭാര്യ, മകൻ മൽഹാർ പടേക്കർ.
മൂന്ന് ദേശീയ ചലച്ചിത്ര അവാർഡുകൾ ഉൾപ്പെടെ നിരവധി പുരസ്കാരങ്ങൾ നേടിയിട്ടുണ്ട്. സിനിമയ്ക്കു പുറമെ മഹാരാഷ്ട്രയിലെ കർഷകരുടെ ദുരിതാശ്വാസ പ്രവർത്തനങ്ങളിലും പങ്കാളിയായിരുന്നു. 2013 ൽ രാജ്യം പത്മശ്രീ നൽകി ആദരിച്ചു. 1999 ൽ നടന്ന കാർഗിൽ യുദ്ധത്തിൽ നേരിട്ടു പങ്കെടുക്കുകയും സൈനികർക്കൊപ്പം അതിർത്തിയിൽ സേവനമനുഷ്ഠിക്കുകയും ചെയ്തിട്ടുണ്ട്. ഹോണററി ലഫ്റ്റനൻ്റ് കേണൽ പദവിയും അദ്ദേഹത്തിനു ലഭിച്ചിരുന്നു.
1970-കളുടെ അവസാനത്തോടെയാണ് അഭിനയരംഗത്തേക്ക് കടന്നുവരുന്നത്. ‘ഗമൻ’ ആയിരുന്നു അദ്ദേഹത്തിന്‍റെ ആദ്യ ചിത്രം. തുടർന്ന്, ഒന്നിനുപുറകെ ഒന്നായി മികച്ച പ്രകടനങ്ങൾ കാഴ്ചവെച്ചുകൊണ്ട് അദ്ദേഹം ചലച്ചിത്രമേഖലയിൽ ഒരിടം ഉറപ്പിച്ചു. ‘പരിന്ദ’, ‘പ്രഹാർ’, ‘അംഗാർ’, ‘ക്രാന്തിവീർ’, ‘അഗ്നി സാക്ഷി’, ‘യശ്വന്ത്’, ‘അബ് തക് ഛപ്പൻ’, ‘അപഹരൻ’, ‘വെൽക്കം’, ‘നത്സാമ്രാട്ട്’ എന്നിവയാണ് പ്രധാന ചിത്രങ്ങൾ. 1989-ൽ ‘പരിന്ദ’ എന്ന ചിത്രത്തിലെ അഭിനയത്തിന് മികച്ച സഹനടനുള്ള ദേശീയ പുരസ്‌കാരവും, 1994-ൽ ‘ക്രാന്തിവീർ’ എന്ന ചിത്രത്തിന് മികച്ച നടനുള്ള പുരസ്‌കാരവും അദ്ദേഹത്തിന് ലഭിച്ചു. തുടർന്ന് 1996-ൽ ‘അഗ്നിസാക്ഷി’യിലെ അഭിനയത്തിന് മികച്ച സഹനടനുള്ള ദേശീയ പുരസ്‌കാരം വീണ്ടും അദ്ദേഹത്തെ തേടിയെത്തി.
