ടൊറന്റോ — സ്റ്റീൽ നിർമ്മാതാക്കളായ സ്റ്റെൽക്കോയുടെ അമേരിക്കൻ ഉടമസ്ഥർ കനേഡിയൻ തൊഴിലാളികളെ വഞ്ചിച്ചതായി കനേഡിയൻ പ്രധാനമന്ത്രി മാർക്ക് കാർണി ചൊവ്വാഴ്ച ആരോപിച്ചു. യു.എസ്. പ്രസിഡന്റ് ഡൊണാൾഡ് ട്രംപിന്റെ ഇറക്കുമതി തീരുവയാണ് ലെയ്ഓഫുകൾക്ക് (തൊഴിൽ നിന്നുള്ള പിരിച്ചുവിടലുകൾക്ക്) കാരണമെന്ന് കമ്പനി വ്യക്തമാക്കിയിരുന്നു. എന്നാൽ ക്ലീവ്‌ലാൻഡ്-ക്ലിഫ്സ് സി.ഇ.ഒ. ഈ തീരുവയെ പരസ്യമായി പിന്തുണച്ചയാളാണെന്ന് കാർണി ചൂണ്ടിക്കാണിച്ചു. അമേരിക്കൻ സ്റ്റീൽ നിർമ്മാതാക്കളെ സംരക്ഷിക്കാൻ 50% തീരുവ അത്യന്താപേക്ഷിതമാണെന്നാണ് ക്ലീവ്‌ലാൻഡ്-ക്ലിഫ്സ് സി.ഇ.ഒ. ലോറെൻകോ ഗോൺകാൽവസ് വിശേഷിപ്പിച്ചത്.
“കമ്പനിയാൽ വഞ്ചിക്കപ്പെട്ട തൊഴിലാളികൾക്കും അവരുടെ കുടുംബങ്ങൾക്കുമൊപ്പമാണ് ഞങ്ങളുടെ ചിന്തകൾ,” കാർണി പറഞ്ഞു.
2024-ൽ 3.4 ബില്യൺ കനേഡിയൻ ഡോളറിന് (2.4 ബില്യൺ യു.എസ്. ഡോളർ) സ്റ്റെൽക്കോയെ ഏറ്റെടുത്തതുമായി ബന്ധപ്പെട്ട് ഒഹായോ ആസ്ഥാനമായുള്ള കമ്പനിക്ക് നിയമപരമായ തൊഴിൽ ബാധ്യതകളുണ്ടെന്നും, അതിനെതിരെ നിയമനടപടി സ്വീകരിക്കുമെന്നും കാർണി മുന്നറിയിപ്പ് നൽകി.
ഒന്റാറിയോയിലെ ഹാമിൽട്ടൺ പ്ലാന്റിലെ കോൾഡ്-റോൾഡ്, കോട്ടഡ് പ്രവർത്തനങ്ങൾ അനിശ്ചിതകാലത്തേക്ക് നിർത്തിവയ്ക്കുകയും ഉൽപ്പാദനം നന്തികോക്കിലുള്ള ലേക്ക് ഈറി ഫെസിലിറ്റിയിലേക്ക് മാറ്റുകയും ചെയ്യുമ്പോൾ 500-ഓളം തൊഴിലാളികളെ ഇത് ബാധിച്ചേക്കാമെന്ന് സ്റ്റെൽക്കോ അറിയിച്ചു. കാനഡയിൽ നിന്ന് സ്റ്റീൽ ഉൽപ്പാദനം പൂർണ്ണമായി മാറ്റുന്നില്ലെന്നും, ഒന്റാറിയോയിലെ നന്തികോക്കിലുള്ള സ്റ്റെൽക്കോയുടെ ലേക്ക് ഈറി വർക്സിൽ ഉൽപ്പാദനം കേന്ദ്രീകരിക്കുമെന്നും ക്ലീവ്‌ലാൻഡ്-ക്ലിഫ്സ് തിങ്കളാഴ്ച വ്യക്തമാക്കി. ബാധിക്കപ്പെടുന്ന ഹാമിൽട്ടണിലെ ധാരാളം തൊഴിലാളികളെ ഇവിടെ ഉൾക്കൊള്ളാൻ കഴിയുമെന്നും മൊത്തത്തിലുള്ള സ്റ്റീൽ ഉൽപ്പാദനത്തിൽ കുറവുണ്ടാകില്ലെന്നും കമ്പനി പറയുന്നു.
യൂ.എസ്. തീരുവ തങ്ങളുടെ കോൾഡ്-റോൾഡ്, ഗാൽവാനൈസ്ഡ് ഉൽപ്പന്നങ്ങളുടെ വിപനിയെ സാരമായി ചുരുക്കിയതായി ജീവനക്കാർക്ക് അയച്ച മെമ്മോയിൽ സ്റ്റെൽക്കോ വ്യക്തമാക്കി. 2024-ലെ ശരാശരിയെ അപേക്ഷിച്ച് രണ്ടാം പാദത്തിൽ തങ്ങൾ പരമ്പരാഗതമായി സേവനം നൽകുന്ന വിപണികളിലെ ആവശ്യം ഏകദേശം 25% കുറഞ്ഞുവെന്നും, ഇതിൽ കാനഡയിലെ 10% കുറവും ഉൾപ്പെടുന്നുവെന്നും കമ്പനി കൂട്ടിച്ചേർത്തു.
കാനഡയും അമേരിക്കയും തമ്മിലുള്ള വ്യാപാരയുദ്ധം രൂക്ഷമാകുന്നതിനിടയിലാണ് ഈ ലെയ്ഓഫുകൾ ഉണ്ടായിരിക്കുന്നത്. കനേഡിയൻ സ്റ്റീലിനും മറ്റ് ഉൽപ്പന്നങ്ങൾക്കും മേൽ ട്രംപ് 50% തീരുവ ചുമത്തിയപ്പോൾ കാനഡയും തിരിച്ചടിച്ച് തീരുവകൾ ഏർപ്പെടുത്തിയിരുന്നു. ആയോവയിൽ പുതിയ 15 ബില്യൺ ഡോളറിന്റെ സ്റ്റീൽ പ്ലാന്റ് പ്രഖ്യാപിച്ചുകൊണ്ട് തിങ്കളാഴ്ച നടന്ന വൈറ്റ് ഹൗസ് ചടങ്ങിൽ, വിദേശ സ്റ്റീൽ ഇറക്കുമതി കുറയ്ക്കുന്നതിനും അമേരിക്കയിലേക്ക് നിക്ഷേപം ആകർഷിക്കുന്നതിനും തന്റെ തീരുവകൾ സഹായിച്ചതായി ട്രംപ് അവകാശപ്പെട്ടിരുന്നു. കമ്പനികൾ അമേരിക്കയിൽ പ്ലാന്റുകൾ നിർമ്മിക്കുന്നത് “അവർക്ക് തീരുവ നൽകാൻ താൽപ്പര്യമില്ലാത്തതുകൊണ്ടാണെന്നും” അദ്ദേഹം പറഞ്ഞു.
തൊഴിലവസരങ്ങൾ സംരക്ഷിക്കുന്നതിനായി ഫെഡറൽ സർക്കാർ സാമ്പത്തിക സഹായം വാഗ്ദാനം ചെയ്തിരുന്നുവെങ്കിലും തുകയോ വ്യവസ്ഥകളോ കാർണി വെളിപ്പെടുത്തിയില്ല. “ഫെഡറൽ സർക്കാരിന്റെ ഭാഗത്തുനിന്ന് ധനസഹായം ലഭ്യമാണ്,” കാർണി വ്യക്തമാക്കി. “കമ്പനി ചില ഉറപ്പുകൾ നൽകിയിട്ടുള്ളതും തൊഴിൽ സംബന്ധിച്ച് നിയമപരമായ ബാധ്യതകൾ ഉള്ളതുമാണ്. ഞങ്ങളുടെ കൈവശമുള്ള എല്ലാ അധികാരങ്ങളും ഉപയോഗിച്ച് നിയമത്തിന്റെ പരമാവധി പരിധി വരെ ഞങ്ങൾ മുന്നോട്ട് പോകും”. യൂണിയനിൽ അംഗങ്ങളായ തൊഴിലാളികളുടെ എണ്ണവും യൂണിയനിൽ ഇല്ലാത്ത ജീവനക്കാരിൽ ഭൂരിഭാഗവും നിലനിർത്തുന്നത് ഉൾപ്പെടെയുള്ള അഞ്ച് വർഷത്തെ നിയമപരമായ തൊഴിൽ വ്യവസ്ഥകൾ പാലിക്കണമെന്ന വ്യവസ്ഥയോടെയാണ് 2024 ഒക്ടോബറിൽ കനേഡിയൻ സർക്കാർ ക്ലീവ്‌ലാൻഡ്-ക്ലിഫ്സിന്റെ സ്റ്റെൽക്കോ ഏറ്റെടുക്കലിന് അനുമതി നൽകിയിരുന്നത്.
കാർണിയുടെ പരാമർശങ്ങളോട് ക്ലീവ്‌ലാൻഡ്-ക്ലിഫ്സ് ഉടൻ പ്രതികരിച്ചിട്ടില്ല.
