കണ്ടന്റ് ക്രിയേറ്റർമാർക്കായി നൂതനമായ ആർട്ടിഫിഷ്യൽ ഇന്റലിജൻസ് (എഐ) ഫീച്ചറുകളും ഇ-കോമേഴ്സ് സേവനങ്ങളും പ്രഖ്യാപിച്ചുകൊണ്ട് യൂട്യൂബ് വലിയ മാറ്റങ്ങൾക്ക് തുടക്കം കുറിച്ചിരിക്കുന്നു. ന്യൂയോർക്കിൽ നടന്ന വാർഷിക ‘മേഡ് ഓൺ യൂട്യൂബ്’ പരിപാടിയിലാണ് ഗൂഗിളിന്റെ പുതിയ എഐ മോഡലുകൾ അവതരിപ്പിച്ചത്. എഐ സാങ്കേതികവിദ്യ ക്രിയേറ്റർമാരുടെ ജോലി നഷ്ടപ്പെടുത്തുമെന്ന ആശങ്കകൾക്കിടയിൽ, അവരെ സഹായിക്കാൻ മാത്രമുള്ളതാണ് ഈ ടൂളുകളെന്നും സർഗാത്മകതയ്ക്ക് തന്നെയാണ് മുൻഗണനയെന്നും കമ്പനി വ്യക്തമാക്കി.

എഡിറ്റിങ്, നിർമാണം തുടങ്ങിയ ജോലികളിലെ ഭാരം കുറയ്ക്കാനായി ഗൂഗിളിന്റെ ജെമിനി അസിസ്റ്റന്റ് യൂട്യൂബ് സ്റ്റുഡിയോയിലും ‘യൂട്യൂബ് ക്രിയേറ്റ്’ ആപ്പിലും ലഭ്യമാക്കും. കൂടാതെ, ടിക് ടോക്, ഇൻസ്റ്റഗ്രാം റീൽസ് എന്നിവയോട് മത്സരിക്കുന്ന ‘യൂട്യൂബ് ഷോർട്സി’ന് പ്രത്യേക പരിഗണന നൽകിയിട്ടുണ്ട്. ക്രിയേറ്റർമാരുടെ സുരക്ഷയ്ക്കായി ‘ലൈഫ്നെസ്സ് ഡിറ്റക്ഷൻ ടൂൾ’ ശക്തമാക്കുകയും, ലൈവ് വീഡിയോകളിൽ മറ്റ് ഭാഷകളിലേക്ക് തത്സമയം വിവർത്തനം ചെയ്യുന്ന ഡബ്ബിംഗ് ടൂൾ കൊണ്ടുവരികയും ചെയ്തിട്ടുണ്ട്.

വീഡിയോകൾക്കപ്പുറം ഇ-കോമേഴ്സ് രംഗത്തേക്കും യൂട്യൂബ് ചുവടുവെക്കുകയാണ്. ആമസോണുമായി അമേരിക്കയിൽ തുടങ്ങിയ പങ്കാളിത്തം ഇന്ത്യയിലേക്കും ബ്രസീലിലേക്കും വ്യാപിപ്പിച്ചിട്ടുണ്ടെന്നും, വർഷാവസാനത്തോടെ 35 രാജ്യങ്ങളിലേക്ക് അഫിലിയേറ്റ് പ്രോഗ്രാം എത്തിക്കാനാണ് ലക്ഷ്യമിടുന്നതെന്നും കമ്പനി അറിയിച്ചു. പ്രേക്ഷകർക്കായി ‘ആസ്ക് യൂട്യൂബ്’ ഫീച്ചറും ഉൽപ്പന്നങ്ങൾ ടാഗ് ചെയ്ത് അഫിലിയേറ്റ് കമ്മീഷൻ നേടാനുള്ള അവസരവും ഇതിലൂടെ ലഭ്യമാകും. ക്രിയേറ്റർമാർക്ക് കൂടുതൽ വരുമാന അവസരങ്ങൾ സൃഷ്ടിക്കുന്നത് വഴി പ്ലാറ്റ്‌ഫോമിലെ ഉള്ളടക്കത്തിന്റെ ഗുണനിലവാരം ഉയർത്തുക എന്നതാണ് ഈ നീക്കത്തിലൂടെ യൂട്യൂബ് ലക്ഷ്യമിടുന്നത്.