ഇടക്കാല തിരഞ്ഞെടുപ്പിന് ദിവസങ്ങൾ മാത്രം ബാക്കിനിൽക്കെ പുറത്തുവന്ന എമേഴ്സൺ കോളജ് സർവേ പ്രകാരം, റിപ്പബ്ലിക്കൻ പാർട്ടിയേക്കാൾ 11 പോയിന്റ് മുന്നിലാണ് ഡെമോക്രാറ്റിക് പാർട്ടി. മോശം സാമ്പത്തികാവസ്ഥയും വർദ്ധിച്ചവരുന്ന വിലക്കയറ്റവും കാരണം പ്രസിഡന്റ് ഡോണൾഡ് ട്രംപിന്റെ ജനപ്രീതി റെക്കോർഡ് താഴ്ചയിലാണെന്ന് ഈ സർവേ വ്യക്തമാക്കുന്നു. എങ്കിലും, ജനറിക് പോളുകൾ ഓരോ മണ്ഡലങ്ങളിലെയും യഥാർത്ഥ മത്സരചിത്രം പൂർണ്ണമായി നൽകില്ലെന്നും, കഴിഞ്ഞ തിരഞ്ഞെടുപ്പുകളിൽ ഹിസ്പാനിക്, സ്വതന്ത്ര വോട്ടർമാരുടെ നിലപാടുകളിൽ വലിയ മാറ്റങ്ങൾ വന്നിട്ടുണ്ടെന്നും വിദഗ്ധർ ചൂണ്ടിക്കാണിക്കുന്നു.
അതേസമയം, തിരഞ്ഞെടുപ്പ് തയ്യാറെടുപ്പുകൾക്കിടയിൽ ടെക്സസിൽ ഗുരുതരമായ വീഴ്ചകളാണ് പുറത്തുവന്നിട്ടുള്ളത്. ഡിപ്പാർട്മെന്റ് ഓഫ് പബ്ലിക് സേഫ്റ്റി വഴി ലഭിച്ച വോട്ടർ രജിസ്ട്രേഷൻ അപേക്ഷകൾ ഡാലസ് കൗണ്ടി അധികാരികൾക്ക് കൈമാറുന്നതിൽ ടെക്സസ് തിരഞ്ഞെടുപ്പ് വിഭാഗത്തിന് പിഴവുകൾ സംഭവിച്ചു. ഇലക്ട്രോണിക് സംവിധാനത്തിലെ തകരാറുകൾ മൂലം ആയിരക്കണക്കിന് അപേക്ഷകളാണ് കൃത്യസമയത്ത് പ്രോസസ്സ് ചെയ്യാൻ കഴിയാത്ത പ്രതിസന്ധിയിലായത്.
ഒക്ടോബർ 19-ലെ ഏർലി വോട്ടിംഗിനും നവംബർ 3-ലെ റെഗുലർ പോളിംഗിനും മുൻപ് ഈ തെറ്റുകൾ തിരുത്തി വോട്ടർമാരുടെ പേരുകൾ പട്ടികയിൽ ഉൾപ്പെടുത്തുക എന്നത് ഉദ്യോഗസ്ഥരെ സംബന്ധിച്ച് വലിയൊരു വെല്ലുവിളിയാണ്. ഓൺലൈൻ പോർട്ടലിൽ രജിസ്റ്റർ ചെയ്ത ചിലരുടെ പേരുകൾ വോട്ടർ പട്ടികയിൽ കാണാതെ വന്നേക്കാമെങ്കിലും, അർഹരായവർക്ക് പ്രൊവിഷണൽ ബാലറ്റിലൂടെ വോട്ടു ചെയ്യാനാകുമെന്ന് അധികൃതർ അറിയിച്ചിട്ടുണ്ട്.
