കുളശേഖരത്തിന് സമീപം കോതയാറ്റിൽ മാസങ്ങളായി നാട്ടുകാരിൽ ആശങ്ക പരത്തിയിരുന്ന മുതല ഒടുവിൽ വലയിൽ കുടുങ്ങി. ഏഴു മാസം മുൻപ് ചെക്കുഴിക്കര ഭാഗത്ത് ആറ്റിനുള്ളിലെ ടാങ്കിനു മുകളിലാണ് ഇതിനെ ആദ്യമായി കണ്ടത്. വനംവകുപ്പ് അധികൃതർ കൂടുകളും വലകളും സ്ഥാപിച്ച് പിടികൂടാൻ പലതവണ ശ്രമിച്ചെങ്കിലും പരാജയപ്പെടുകയായിരുന്നു. കഴിഞ്ഞ മാസം ചെന്നൈയിൽ നിന്നും വിദഗ്ധ സംഘം എത്തിയെങ്കിലും മുതല പിടിയിലായിരുന്നില്ല.
ഇന്നലെ രാവിലെ ചെക്കുഴിക്കര ടാങ്കിന് സമീപമുള്ള പാലത്തിനടിയിൽ വലയിൽ കുടുങ്ങിയ നിലയിലാണ് മുതലയെ ഒരു കാൽനടയാത്രികൻ കണ്ടത്. ഉടൻ തന്നെ വിവരം വനംവകുപ്പ് ഓഫീസിൽ അറിയിക്കുകയായിരുന്നു. തിരുവനന്തപുരത്തുനിന്നുള്ള ഡൈവിങ് സംഘം എത്തി പരിശോധന നടത്തിയ ശേഷം തുടർനടടികൾ സ്വീകരിക്കുമെന്ന് അധികൃതർ വ്യക്തമാക്കിയിട്ടുണ്ട്. മുതല വലയിലായതറിഞ്ഞ് നിരവധി ആളുകളാണ് പ്രദേശത്ത് തടിച്ചുകൂടിയത്.
