സംരംഭകത്വ മേഖലയിൽ തുടർച്ചയായ ആഗോള മുന്നേറ്റം കാഴ്ചവെയ്ക്കുന്ന യു.എ.ഇയിൽ ചെറുകിട, ഇടത്തരം സ്ഥാപനങ്ങളുടെ (എസ്.എം.ഇ) സജീവ ലൈസൻസുകളുടെ എണ്ണം കഴിഞ്ഞ രണ്ട് പതിറ്റാണ്ടിനിടെ 900 ശതമാനത്തിലധികം വർധിച്ചതായി കണക്കുകൾ വ്യക്തമാക്കുന്നു. സാമ്പത്തിക, ടൂറിസം മന്ത്രി അബ്ദുല്ല ബിൻ തൂഖ് അൽ മർരിയുടെ അധ്യക്ഷതയിൽ ചേർന്ന യു.എ.ഇ സംരംഭകത്വ കൗൺസിൽ യോഗത്തിലാണ് ഈ നേട്ടങ്ങൾ അവലോകനം ചെയ്തത്. ഇതിൽ കഴിഞ്ഞ അഞ്ച് വർഷത്തിനിടെ മാത്രം 140 ശതമാനത്തിലേറെ വളർച്ചയാണ് രേഖപ്പെടുത്തിയിട്ടുള്ളത്.
രാജ്യത്തെ ആകെയുള്ള കമ്പനികളുടെ 95 ശതമാനവും, സ്വകാര്യ മേഖലയിലെ തൊഴിലവസരങ്ങളിൽ 85 ശതമാനത്തിലേറെയും ഈ ചെറുകിട-ഇടത്തരം സ്ഥാപനങ്ങളുടെ സംഭാവനയാണ്. ആഗോള സംരംഭകത്വ നിരീക്ഷണ റിപ്പോർട്ട് 2025-26 പ്രകാരം തുടർച്ചയായ അഞ്ചാം വർഷവും യു.എ.ഇ ലോകത്ത് ഒന്നാം സ്ഥാനം നിലനിർത്തിയതോടൊപ്പം, സംരംഭക ധനസഹായം ഉൾപ്പെടെയുള്ള സൂചികകളിൽ രണ്ടാം സ്ഥാനവും സ്വന്തമാക്കിയിട്ടുണ്ട്. കൂടാതെ, സ്റ്റാർട്ടപ്പ് തലസ്ഥാനമായ യു.എ.ഇയുടെ നേതൃത്വത്തിൽ നൂറുകണക്കിന് ഇമാറാത്തികൾക്ക് പരിശീലനം നൽകുകയും വിവിധ സർക്കാർ സംരംഭങ്ങൾ ആരംഭിക്കുകയും ചെയ്തിട്ടുണ്ട്.
ചെറുകിട സംരംഭങ്ങളുടെ ദീർഘകാല സുസ്ഥിരത ലക്ഷ്യമിട്ടുള്ള ദേശീയ തന്ത്രങ്ങളുടെ ഭാഗമായി, ഗ്രാമപ്രദേശങ്ങളിലും വിദൂര മേഖലകളിലുമുള്ള സംരംഭകർക്കായി ലൈസൻസ്, ധനസഹായം, ഇൻക്യുബേഷൻ, വിപണി പ്രവേശനം തുടങ്ങിയ സൗകര്യങ്ങൾ ഉറപ്പാക്കുന്ന ‘ഗ്രാമങ്ങളിലെ മൊബൈൽ ആക്സിലറേറ്ററുകൾ’ പദ്ധതി കൂടുതൽ വിപുലീകരിക്കാനും കൗൺസിൽ തീരുമാനിച്ചിട്ടുണ്ട്.
