പ്രൊഫ. ഗോപിനാഥ് മുതുകാട് അഞ്ചു വർഷത്തെ ഇടവേളയ്ക്ക് ശേഷം വീണ്ടും വേദിയിലെത്തുന്ന “എംക്യൂബ്” (Magic, Melody, Mission) ഫ്യൂഷൻ ഷോ സെപ്റ്റംബർ 6 ഞായറാഴ്ച വൈകിട്ട് 5:30-ന് ന്യൂയോർക്കിലെ ക്വീൻസ്ബൊറോ കമ്മ്യൂണിറ്റി കോളേജ് ഓഡിറ്റോറിയത്തിൽ നടക്കുന്നു. തിരുവനന്തപുരം കഴക്കൂട്ടത്തെ ഡിഫറന്റ് ആർട്സ് സെന്ററിന്റെ (DAC) പ്രവർത്തനങ്ങൾക്കായി മാറ്റിവെച്ചതിനാലാണ് അദ്ദേഹം സ്റ്റേജ് ഷോകളിൽ നിന്ന് വിട്ടുനിന്നിരുന്നത്. അതിനിടയിലാണ് കാസർഗോഡുള്ള എൻഡോസൾഫാൻ ദുരിതബാധിതരുടെ പുനരധിവാസം എന്ന വലിയ ദൗത്യത്തിലേക്ക് അദ്ദേഹം തിരിഞ്ഞത്.
പാലാ സ്വദേശിയും മുൻ ബി.സി.എം. കോളേജ് അധ്യാപകനുമായിരുന്ന പരേതനായ ഡോ. എം. കെ. ലൂക്കോസിന്റെ ആഗ്രഹപ്രകാരമാണ് ഈ പദ്ധതിക്ക് തുടക്കമായത്. അദ്ദേഹത്തിന്റെ സാമ്പത്തിക സഹായത്തോടെ 20 ഏക്കർ സ്ഥലം വാങ്ങിയെങ്കിലും, രോഗബാധയെ തുടർന്ന് അദ്ദേഹം അന്തരിച്ചു. ഈ സ്വപ്നം സാക്ഷാത്കരിക്കാനായാണ് മാജിക്കും സംഗീതവും ചാരിറ്റിയും കോർത്തിണക്കിയുള്ള ‘എംക്യൂബ്’ ഷോയിലൂടെ ധനസമാഹരണം നടത്തുന്നത്. അമേരിക്കയിലുടനീളം മികച്ച പ്രതികരണം നേടിയ ഈ പരമ്പരയിലെ അവസാന ഷോയാണിത്. 501(C)(3) അംഗീകാരമുള്ളതിനാൽ സംഭാവന നൽകുന്നവർക്ക് നികുതി ഇളവ് ലഭിക്കും.
ലോകപ്രശസ്ത മാന്ത്രികനും ഇന്റർനാഷണൽ മാജീഷ്യൻസ് സൊസൈറ്റി (IMS) സ്ഥാപകനുമായ ടോണി ഹസ്സിനി പരിപാടിയിൽ മുഖ്യാതിഥിയായി പങ്കെടുക്കും. 2011-ൽ മുതുകാടിന് ലഭിച്ച പ്രശസ്തമായ ‘മെർലിൻ അവാർഡ്’ നൽകുന്നത് ഈ സൊസൈറ്റിയാണ്.
