ചൈനീസ് ഉൽപ്പന്നങ്ങൾക്കെതിരായ തീരുവ വെട്ടിക്കാൻ അവ മൂന്നാം രാജ്യങ്ങൾ വഴി യു.എസിലേക്ക് കടത്തുന്നുവെന്ന് ആരോപിച്ച്, ട്രംപ് ഭരണകൂടം തയാറാക്കിയ ‘ഷാഡോ ട്രാൻസ്ഷിപ്പ്മെന്റ് നെറ്റ്വർക്കിൽ’ ഇന്ത്യയെയും ഉൾപ്പെടുത്തി. ചൈനയിൽ നിന്നുള്ള ഉൽപ്പന്നങ്ങളുടെ യഥാർത്ഥ ഉറവിടം മറച്ചുവെക്കാൻ സഹായിക്കുന്ന ഈ ശൃംഖലയിൽ ഇന്ത്യയടക്കം 40-ലധികം രാജ്യങ്ങൾ പങ്കാളികളാണെന്ന് ‘ദ ഗ്രേറ്റ് ട്രാൻസ്ഷിപ്പ്മെന്റ് സ്കാം: ഗ്ലോബൽ ഇവേഷൻ ആൻഡ് എക്കണോമിക് കോസ്റ്റ്സ്’ എന്ന തലക്കെട്ടിൽ വൈറ്റ് ഹൗസ് പുറത്തുവിട്ട റിപ്പോർട്ടിൽ വ്യക്തമാക്കുന്നു.
വൈറ്റ് ഹൗസ് റിപ്പോർട്ട് ഈ ശൃംഖലയെ മൂന്ന് ഘട്ടങ്ങളായാണ് തരംതിരിച്ചിരിക്കുന്നത്. വലിയ തോതിലുള്ള നിയമപരമായ വ്യാപാരങ്ങൾക്കിടയിൽ അനധികൃത ട്രാൻസ്ഷിപ്പ്മെന്റ് നിരക്ക് ഒളിഞ്ഞിരിക്കുന്ന ഒന്നാം നിരയിലാണ് ഇന്ത്യ, മെക്സിക്കോ, കാനഡ, യൂറോപ്യൻ യൂണിയൻ എന്നിവയെ ഉൾപ്പെടുത്തിയിരിക്കുന്നത്. ചൈനയുമായി അടുത്ത ബന്ധമുള്ള വിയറ്റ്നാം, മലേഷ്യ, തായ്ലൻഡ് എന്നിവ രണ്ടാം നിരയിലും, ദുർബലമായ കസ്റ്റംസ് പരിശോധനയുള്ള കമ്പോഡിയ, പനാമ, യു.എ.ഇ തുടങ്ങിയ ചെറിയ സാമ്പത്തിക ശക്തികൾ മൂന്നാം നിരയിലുമാണ്. 2025-ൽ മെക്സിക്കോ, ഇന്ത്യ, വിയറ്റ്നാം എന്നീ പ്രധാന കേന്ദ്രങ്ങൾ വഴി ചൈനയിൽ നിന്ന് 67 ബില്യൺ ഡോളറിന്റെ ഉൽപ്പന്നങ്ങൾ യു.എസിലേക്ക് കടത്തിയെന്നും, ഇതുമൂലം 28 ബില്യൺ ഡോളറിന്റെ നികുതി വരുമാന നഷ്ടം ഉണ്ടായെന്നും വൈറ്റ് ഹൗസ് റിപ്പോർട്ട് പറയുന്നു. ഉൽപ്പന്നങ്ങളുടെ നിർമ്മാണ ഉറവിടം നിർണ്ണയിക്കുന്ന നിലവിലെ മാനദണ്ഡങ്ങളിൽ കർശനമായ ഭേദഗതികൾ വരുത്താൻ യു.എസ് കോൺഗ്രസിന്റെ അടിയന്തര ഇടപെടലും റിപ്പോർട്ട് ആവശ്യപ്പെടുന്നു.
റിസിപ്രോക്കൽ തീരുവകൾ മുൻപ് യു.എസ് സുപ്രീം കോടതി റദ്ദാക്കിയ സാഹചര്യത്തിൽ, കോൺഗ്രസ് വഴി പുതിയ നിയന്ത്രണങ്ങൾ കൊണ്ടുവരാനുള്ള ട്രംപ് ഭരണകൂടത്തിന്റെ നീക്കമാണിതെന്ന് അന്താരാഷ്ട്ര വ്യാപാര വിദഗ്ദ്ധർ വിലയിരുത്തുന്നു. ഇന്ത്യയെ ഒന്നാം നിരയിൽ ഉൾപ്പെടുത്തിയത് വരാനിരിക്കുന്ന ഉഭയകക്ഷി വ്യാപാര കരാറിൽ ചൈനയെ ആശ്രയിക്കുന്നത് കുറയ്ക്കാനുള്ള വ്യവസ്ഥകൾ ഉൾപ്പെടുത്താൻ യു.എസ് സമ്മർദ്ദം ചെലുത്തുമെന്നതിന്റെ സൂചനയാണെന്ന് ഖൈത്താൻ & കോയിലെ അഭിഭാഷകർ അഭിപ്രായപ്പെട്ടു. ഇതിലൂടെ ഇന്ത്യയിൽ നിന്നുള്ള ചില ഉൽപ്പന്നങ്ങൾക്ക് മേൽ യു.എസ് പരിശോധനകൾ കടുപ്പിച്ചേക്കാം. എന്നാൽ വ്യാപാര പങ്കാളികളെ സമ്മർദ്ദത്തിലാക്കാനുള്ള ശ്രമമാണിതെന്നും, യഥാർത്ഥ ആഭ്യന്തര നിർമ്മാണവും അനധികൃത ട്രാൻസ്ഷിപ്പ്മെന്റും തമ്മിൽ വേർതിരിച്ചു കാണിക്കുന്നതിൽ റിപ്പോർട്ട് പരാജയപ്പെട്ടതിനാൽ ഇന്ത്യ ഇതിനെതിരെ ചോദ്യങ്ങൾ ഉന്നയിക്കണമെന്നും മുൻ വ്യാപാര ചർച്ചുകാരനായ അഭിജിത് ദാസ് പ്രതികരിച്ചു.
ഇതുകൂടാതെ, ആഗോള നിർമ്മാണ കേന്ദ്രങ്ങളെ യു.എസ് റിപ്പോർട്ടിൽ “ഡർട്ടി സിസ്റ്റേഴ്സ്” എന്ന് വിശേഷിപ്പിച്ചിട്ടുണ്ട്. പൂനെ–ഗുജറാത്ത്–ചെന്നൈ ഇടനാഴി വഴി ഹെവി പമ്പുകളും കംപ്രസ്സറുകളും കടത്തുന്നുവെന്നും ഇത് യു.എസ് നഗരങ്ങളിലെ ഉൽപ്പാദനത്തെ ബാധിക്കുന്നുവെന്നും റിപ്പോർട്ട് ആരോപിക്കുന്നു. എന്നാൽ ന്യൂഡൽഹി ആസ്ഥാനമായുള്ള ‘ഗ്ലോബൽ ട്രേഡ് റിസർച്ച് ഇനിഷ്യേറ്റീവ്’ (GTRI) ഈ ആരോപണങ്ങൾ തള്ളി. 2026 സാമ്പത്തിക വർഷത്തിൽ ഇന്ത്യ 1.61 ബില്യൺ ഡോളറിന്റെ ലിക്വിഡ് പമ്പുകളും 1.48 ബില്യൺ ഡോളറിന്റെ എയർ പമ്പുകളും ആഗോളതലത്തിൽ കയറ്റുമതി ചെയ്തിട്ടുണ്ടെന്നും, ചൈനയിൽ നിന്നുള്ള ഇറക്കുമതി വളരെ കുറവാണെന്നും ജി.ടി.ആർ.ഐ വ്യക്തമാക്കുന്നു. ഇന്ത്യയുടെ വൻതോതിലുള്ള ആഗോള കയറ്റുമതി കണക്കുകൾ വ്യക്തമാക്കുന്നത് ഇവ ചൈനീസ് ഉൽപ്പന്നങ്ങൾ റീ-റൂട്ട് ചെയ്യുന്നതല്ല, മറിച്ച് ഇന്ത്യയിൽ തന്നെ നിർമ്മിക്കുന്നവയാണെന്നാണ്.
