ദുബായ്: വ്യോമയാന, കോർപ്പറേറ്റ് മേഖലകളിൽ നൂറിലധികം പുതിയ തൊഴിലവസരങ്ങൾ പ്രഖ്യാപിച്ച് എമിറേറ്റ്‌സ് ഗ്രൂപ്പ്. പരിചയസമ്പന്നരായ പ്രൊഫഷണലുകൾക്കും തുടക്കക്കാർക്കും ഒരേപോലെ അവസരം നൽകുന്ന ഈ റിക്രൂട്ട്‌മെന്റ് ഡ്രൈവിൽ യുഎഇ സ്വദേശികളായ ഉദ്യോഗാർത്ഥികളുടെ തിരഞ്ഞെടുപ്പിനും വികസനത്തിനും പ്രത്യേക മുൻഗണന നൽകുന്നുണ്ട്. ഇൻഫർമേഷൻ ടെക്നോളജി, എഞ്ചിനീയറിംഗ് ആൻഡ് മെയിന്റനൻസ്, എയർപോർട്ട് ഓപ്പറേഷൻസ്, ലോജിസ്റ്റിക്സ്, ഹ്യൂമൻ റിസോഴ്‌സ്, കസ്റ്റമർ സർവീസ് എന്നീ മേഖലകളിലാണ് പ്രമുഖ തസ്തികകൾ. താല്പര്യമുള്ള ഉദ്യോഗാർത്ഥികൾക്ക് എമിറേറ്റ്‌സ് ഗ്രൂപ്പിന്റെ ഔദ്യോഗിക കരിയർ പോർട്ടൽ വഴി അപേക്ഷകൾ സമർപ്പിക്കാം.
തിരഞ്ഞെടുക്കപ്പെടുന്നവർക്ക് തസ്തികയ്ക്കും പരിചയ സമ്പത്തിനും അനുയോജ്യമായ ആകർഷകമായ ശമ്പള പാക്കേജാണ് ഗ്രൂപ്പ് വാഗ്ദാനം ചെയ്യുന്നത്. നികുതിരഹിത ശമ്പളം, ഫർണിഷ് ചെയ്ത താമസസൗകര്യം അല്ലെങ്കിൽ ഹൗസിംഗ് അലവൻസ്, സമഗ്രമായ മെഡിക്കൽ ഇൻഷുറൻസ്, വാർഷിക വിമാന ടിക്കറ്റുകൾ, ജീവനക്കാർക്കും കുടുംബാംഗങ്ങൾക്കും വേണ്ടിയുള്ള പ്രത്യേക യാത്രാ ഇളവുകൾ എന്നിവ ആനുകൂല്യങ്ങളിൽ ഉൾപ്പെടുന്നു. ഗ്രൂപ്പിലെ ഏറ്റവും ഉയർന്ന വരുമാനമുള്ള പൈലറ്റ് തസ്തികയ്ക്ക് പ്രതിവർഷം ഏകദേശം 12 ലക്ഷം ദിർഹം (3,20,000 യു.എസ് ഡോളർ) മൂല്യമുള്ള പാക്കേജാണ് ലഭിക്കുക. മാസം ശരാശരി 85 മണിക്കൂർ ഫ്ലയിംഗ് സമയം കണക്കാക്കി 5,75,000 ദിർഹം ക്യാഷ് സാലറിയും 42 ദിവസത്തെ വാർഷിക അവധിയും ഇതിലൂടെ ലഭ്യമാകും.
കൂടാതെ ‘നാഷണൽ കേഡറ്റ് പൈലറ്റ് പ്രോഗ്രാമിലേക്കുള്ള’ അപേക്ഷകളും എമിറേറ്റ്‌സ് ക്ഷണിക്കുന്നുണ്ട്. പരിശീലനത്തിന്റെ ആദ്യഘട്ടത്തിൽ 6,365 ദിർഹം പ്രതിമാസ സ്റ്റൈപ്പൻഡ് ലഭിക്കുന്ന ട്രെയിനികൾക്ക് പരിശീലനം പൂർത്തിയാക്കി ഫസ്റ്റ് ഓഫീസറായി മാറുമ്പോൾ പ്രതിമാസം 52,000 ദിർഹം വരെ പാക്കേജ് ലഭിക്കും. കാബിൻ ക്രൂ വിഭാഗത്തിലേക്ക് തിരഞ്ഞെടുക്കപ്പെടുന്നവർക്ക് അടിസ്ഥാന ശമ്പളവും ഫ്ലയിംഗ് അവറുകൾക്ക് മണിക്കൂറിന് 69.60 ദിർഹം നിരക്കിലുള്ള പടിയും ചേർത്ത് പ്രതിമാസം ശരാശരി 11,000 ദിർഹത്തോളം നികുതിരഹിത വരുമാനം നേടാനാകും. ലേ-ഓവറുകളിലെ ഹോട്ടൽ താമസവും ഭക്ഷണ അലവൻസുകളും കമ്പനി നേരിട്ട് നൽകും.
