നീണ്ട ഇടവേളയ്ക്ക് ശേഷം ബോളിവുഡ് താരം പ്രീതി സിന്റ വെള്ളിത്തിരയിലേക്ക് തിരിച്ചെത്തുന്നു. രാജ്കുമാർ സന്തോഷി സംവിധാനം ചെയ്യുന്ന ‘ബട്‌വാര 1947’ എന്ന ചിത്രത്തിലൂടെയാണ് താരത്തിന്റെ മടങ്ങിവരവ്. ‘ദിൽ സേ’, ‘കൽ ഹോ നാ ഹോ’, ‘വീർ-സാറ’, ‘ലക്ഷ്യ’ തുടങ്ങിയ ഹിറ്റ് ചിത്രങ്ങളിലൂടെ പ്രശസ്തയായ താരം, ഭർത്താവ് ജീൻ ഗുഡ്‌ഇനഫുമൊത്ത് ലോസ് ഏഞ്ചലസിലേക്ക് മാറിയതിനെ തുടർന്നാണ് അഭിനയരംഗത്തുനിന്ന് വിട്ടുനിന്നത്.
സിനിമയിൽ നിന്ന് മാറിനിന്ന കാലയളവിൽ അഭിനയം താൻ മിസ്സ് ചെയ്തിരുന്നില്ലെന്ന് പ്രീതി തുറന്നുപറഞ്ഞു. കരിയറിനേക്കാൾ കുടുംബജീവിതത്തിന് മുൻഗണന നൽകിയതിനാലാണ് ഇത്തരമൊരു ഇടവേളയെടുത്തത്. വ്യക്തിജീവിതത്തിൽ ശ്രദ്ധ കേന്ദ്രീകരിക്കുകയും കുടുംബത്തോടൊപ്പം സമയം ചെലവഴിക്കുകയും ചെയ്തത് തനിക്ക് പുതിയൊരു അനുഭവമായിരുന്നുവെന്നും, മിസ്സ് ചെയ്തുവെന്ന് വെറുതെ നുണ പറയാൻ ആഗ്രഹിക്കുന്നില്ലെന്നും താരം വ്യക്തമാക്കി.
സിനിമാ കരിയറിലെ വിജയങ്ങളേക്കാൾ അമ്മയായതിനാണ് താൻ കൂടുതൽ മൂല്യം കൽപ്പിക്കുന്നതെന്നും പ്രീതി കൂട്ടിച്ചേർത്തു. കരിയറിൽ എത്ര വലിയ നേട്ടങ്ങൾ സ്വന്തമാക്കിയിട്ടുണ്ടെങ്കിലും, കുട്ടികളും കുടുംബവും ഉണ്ടായതാണ് തന്റെ ജീവിതത്തിലെ ഏറ്റവും വലിയ നാഴികക്കല്ലെന്നും, അതിനാൽ കുടുംബത്തിനാണ് താൻ എപ്പോഴും ആദ്യ പരിഗണന നൽകുന്നതെന്നും താരം വ്യക്തമാക്കി.
