കാനഡയിൽ മികച്ച ഭാവി കെട്ടിപ്പടുക്കാൻ എത്തുന്ന കുടിയേറ്റക്കാരെ വ്യാജ ഇമിഗ്രേഷൻ ഏജൻ്റുമാരിൽ നിന്നും കൺസൾട്ടൻ്റുകളിൽ നിന്നും സംരക്ഷിക്കുന്നതിനായി കൂടുതൽ ശക്തമായ നിയമങ്ങൾ നടപ്പിലാക്കുന്നു. കുടിയേറ്റക്കാർക്ക് വിശ്വസനീയവും സുതാര്യവുമായ സേവനങ്ങൾ ഉറപ്പാക്കാനും തട്ടിപ്പുകൾ തടയാനും ഇമിഗ്രേഷൻ നിയമങ്ങൾ കർശനമാക്കുന്നതിലൂടെ സാധിക്കുമെന്ന് കനേഡിയൻ ഇമിഗ്രേഷൻ മന്ത്രി ലെന മെറ്റ്‌ലെജ് ഡിയാബ് വ്യക്തമാക്കി. പുതിയ പരിഷ്‌കാരങ്ങൾ ജൂലൈ 15 ബുധനാഴ്ച മുതൽ പ്രാബല്യത്തിൽ വരുമെന്ന് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) അറിയിച്ചു.
പുതിയ ഇമിഗ്രേഷൻ ചട്ടങ്ങൾ നിലവിൽ വരുന്നതോടെ ‘കോളേജ് ഓഫ് ഇമിഗ്രേഷൻ ആൻഡ് സിറ്റിസൺഷിപ്പ് കൺസൾട്ടൻസിൻ്റെ അധികാരങ്ങൾ കൂടുതൽ ശക്തമാകും. നിയമങ്ങൾ ലംഘിക്കുന്ന കൺസൾട്ടൻ്റുകൾക്കെതിരെ കനത്ത പിഴ ചുമത്താനും അച്ചടക്ക നടപടികൾ വേഗത്തിലാക്കാനും പുതിയ നിയമം വ്യവസ്ഥ ചെയ്യുന്നുണ്ട്. വ്യാജ കൺസൾട്ടൻ്റുകളുടെ തട്ടിപ്പിനിരയായി സാമ്പത്തിക നഷ്ടം സംഭവിക്കുന്ന ഇരകൾക്ക് നഷ്ടപരിഹാരം നൽകുന്നതിനായി ഒരു പ്രത്യേക ഫണ്ട് രൂപീകരിക്കുന്നതിനുള്ള മാർഗ്ഗരേഖകളും തയ്യാറാക്കും. കൂടാതെ, സുതാര്യത ഉറപ്പാക്കുന്നതിനായി ലൈസൻസുള്ള കൺസൾട്ടൻ്റുമാരുടെ പൊതുവിവരങ്ങൾ അടങ്ങിയ രജിസ്റ്റർ 2027 ഏപ്രിൽ മുതൽ പരിഷ്കരിക്കാനും തീരുമാനിച്ചു.
അന്താരാഷ്ട്ര വിദ്യാർത്ഥികളിൽ നിന്ന് ട്യൂഷൻ ഫീസ് എന്ന വ്യാജേന 1.26 ലക്ഷം ഡോളറോളം തട്ടിയെടുത്ത കേസിൽ ഒൻ്റാരിയോയിൽ നിന്നുള്ള രണ്ട് വ്യക്തികൾക്കെതിരെ കാനഡ ബോർഡർ സർവീസസ് ഏജൻസി 12 ക്രിമിനൽ കുറ്റങ്ങൾ ചുമത്തി ദിവസങ്ങൾക്കകമാണ് പുതിയ നിയമ പരിഷ്കരണങ്ങൾ വരുന്നത്. പുതിയ മാറ്റങ്ങളുടെ ഭാഗമായി കൺസൾട്ടൻസി ബോർഡ് തങ്ങളുടെ ഉത്തരവാദിത്തങ്ങളിൽ പരാജയപ്പെട്ടാൽ, ബോർഡിൻ്റെ ചുമതലകൾ ഏറ്റെടുക്കാൻ മറ്റൊരാളെ നിയമിക്കാനുള്ള അധികാരം ഇമിഗ്രേഷൻ മന്ത്രിക്കുണ്ടായിരിക്കും. നിയമപരമായ പഴുതുകൾ അടച്ചുകൊണ്ടുള്ള ഈ കർശന നടപടികൾ കാനഡയുടെ ഇമിഗ്രേഷൻ മേഖലയിലെ സുതാര്യത വർധിപ്പിക്കുമെന്നാണ് വിലയിരുത്തുന്നത്.
