ആൽബർട്ടയിൽ കൂടുതൽ സുരക്ഷാ സംവിധാനങ്ങളോടെ തയ്യാറാക്കിയ ഡ്രൈവിംഗ് ലൈസൻസുകളും ഐഡി കാർഡുകളും വിതരണം ചെയ്യാൻ തുടങ്ങി. പുതിയ കാർഡുകൾക്കായി അപേക്ഷിക്കുന്നവർക്കും നിലവിലുള്ളവ പുതുക്കുന്നവർക്കും ഈ കാർഡുകൾ ലഭിക്കും. വ്യക്തിഗത ഹെൽത്ത് നമ്പറുകൾ കൂടി ഉൾപ്പെടുത്താനുള്ള സൗകര്യം പുതിയ കാർഡുകളിൽ ഒരുക്കിയിട്ടുണ്ട്.
നിലവിലുള്ള പേപ്പർ ഹെൽത്ത് കാർഡുകൾ ഘട്ടംഘട്ടമായി നിർത്തലാക്കുക എന്ന ലക്ഷ്യത്തോടെയാണ് പുതിയ കാർഡുകൾ അവതരിപ്പിച്ചത്. ഈ കാർഡിൽ ഹെൽത്ത് നമ്പർ രേഖപ്പെടുത്തുന്നതിനായി അപേക്ഷകർ തങ്ങളുടെ നിലവിലുള്ള ഹെൽത്ത് കാർഡ്, സാധുവായ ഐഡൻ്റിറ്റി രേഖകൾ, കാനഡയിൽ താമസിക്കാനുള്ള നിയമപരമായ അനുമതി എന്നിവ രജിസ്ട്രി ഏജൻ്റുമാർക്ക് മുന്നിൽ ഹാജരാക്കണം. കനേഡിയൻ പൗരത്വ വിവരങ്ങൾ വ്യക്തമാക്കുന്ന പ്രത്യേക അടയാളങ്ങളും പുതിയ കാർഡുകളിൽ ഉൾപ്പെടുത്തിയിട്ടുണ്ട്. അതേസമയം യോഗ്യരായ പൗരന്മാരല്ലാത്തവർക്കും പ്രവിശ്യാ ഐഡി കാർഡുകൾ സ്വന്തമാക്കാൻ സാധിക്കും. ഇതിനായി കനേഡിയൻ പാസ്പോർട്ട്, പെർമനൻ്റ് റസിഡൻ്റ് കാർഡ്, ജനന സർട്ടിഫിക്കറ്റ് തുടങ്ങിയ കാനഡയിലെ നിയമപരമായ താമസാവകാശം തെളിയിക്കുന്ന രേഖകൾ സമർപ്പിക്കണം.
