അമേരിക്കൻ സ്വാതന്ത്ര്യത്തിന്റെ 250-ാം വാർഷികാഘോഷങ്ങളുടെ ഭാഗമായി രാജ്യം ഒരു പ്രത്യേക സ്മരണാർത്ഥ പാസ്‌പോർട്ട് പുറത്തിറക്കി. പാസ്‌പോർട്ട് അപേക്ഷാ നടപടികൾ കൂടുതൽ ആധുനികവത്കരിക്കുന്നതിനും ഡിജിറ്റലൈസ് ചെയ്യുന്നതിനുമുള്ള പദ്ധതികൾക്കൊപ്പമാണ് പുനർരൂപകൽപ്പന ചെയ്ത ഈ യാത്രാ രേഖയും അവതരിപ്പിച്ചിരിക്കുന്നത്. ജൂലൈ 6 മുതൽ ലഭ്യമാകുന്ന ഈ പരിമിതകാല എഡിഷൻ പാസ്‌പോർട്ടിൽ, അമേരിക്കൻ ചരിത്രത്തിലെ നിർണ്ണായക നിമിഷങ്ങളിൽ നിന്ന് പ്രചോദനം ഉൾക്കൊണ്ടുള്ള പ്രത്യേക കലാസൃഷ്ടികളും ചിത്രങ്ങളും ഉൾപ്പെടുത്തിയിട്ടുണ്ട്. അതേസമയം, സാധാരണ യു.എസ്. പാസ്‌പോർട്ടിലുള്ള സുരക്ഷാ ഫീച്ചറുകളെല്ലാം ഇതിലും നിലനിർത്തിയിട്ടുണ്ട്. രാജ്യം വരുംവർഷങ്ങളിൽ “നയിക്കാനും നവീകരിക്കാനും പ്രചോദിപ്പിക്കാനുമുള്ള” പ്രതിജ്ഞാബദ്ധതയാണ് പുതിയ പാസ്‌പോർട്ട് പ്രതിഫലിപ്പിക്കുന്നതെന്ന് വാഷിംഗ്ടണിൽ നടന്ന ചടങ്ങിൽ യു.എസ്. സ്റ്റേറ്റ് ഡിപ്പാർട്ട്മെന്റ് വ്യക്തമാക്കി.
സ്വാതന്ത്ര്യം, സ്വയംഭരണം, ദേശീയ ഐക്യം എന്നീ മൂല്യങ്ങളെ മാനിച്ചുകൊണ്ട് രാജ്യം രൂപീകൃതമായതിന്റെ 250 വർഷങ്ങൾ തികയുന്ന ജൂലൈ 4-ലെ സ്വാതന്ത്ര്യദിനാഘോഷങ്ങൾക്ക് രാജ്യം ഒരുങ്ങുന്നതിനിടയിലാണ് ഈ പുതിയ പാസ്‌പോർട്ടിന്റെ വരവ്. പൗരന്മാർക്ക് ചരിത്രത്തിന്റെ ഒരു ഭാഗം തങ്ങളോടൊപ്പം കൊണ്ടുനടക്കാനുള്ള ഒരു മാർഗ്ഗമായാണ് ഈ സ്മരണാർത്ഥ പാസ്‌പോർട്ടിനെ സ്റ്റേറ്റ് ഡിപ്പാർട്ട്മെന്റ് വിശേഷിപ്പിച്ചത്. “അമേരിക്കയുടെ ജന്മദിനത്തിനുള്ള ഉചിതമായ ആദരവാണ് ഈ സ്മരണാർത്ഥ പാസ്‌പോർട്ട്. ഇത് അമേരിക്കക്കാർക്ക് നമ്മുടെ രാജ്യത്തിന്റെ സ്ഥാപനവുമായി ഒരു യഥാർത്ഥ ബന്ധം നൽകുകയും ലോകം ചുറ്റാനുള്ള സ്വാതന്ത്ര്യത്തിന്റെ പ്രതീകമായി മാറുകയും ചെയ്യുന്നു,” അധികൃതർ പറഞ്ഞു.
ഇതൊരു അന്താരാഷ്ട്ര യാത്രാ രേഖ എന്നതിലുപരിയായി വലിയൊരു അർത്ഥം ഉൾക്കൊള്ളുന്നുണ്ടെന്ന് യു.എസ്. സ്റ്റേറ്റ് സെക്രട്ടറി മാർക്കോ റൂബിയോ ചടങ്ങിൽ വ്യക്തമാക്കി. “പാസ്‌പോർട്ട് എന്നത് വെറുമൊരു യാത്രാ രേഖ മാത്രമല്ല; അത് പ്രതിനിധീകരിക്കുന്ന മൂല്യങ്ങൾ കാരണം അത് അങ്ങേയറ്റം വിലപ്പെട്ടതാണ്. വിദേശയാത്രകളിൽ ഈ അമേരിക്കൻ പാസ്‌പോർട്ട് കാണിക്കുന്നത് നമ്മളിൽ പലർക്കും വലിയ അഭിമാനത്തിന് കാരണമാകുന്ന ഒന്നാണ്,” റൂബിയോ പറഞ്ഞു.
അമേരിക്കൻ പാസ്‌പോർട്ട് സംവിധാനം ആധുനികവത്കരിക്കാനുള്ള വിപുലമായ ശ്രമങ്ങളുടെ ഭാഗമാണ് ഈ സ്മരണാർത്ഥ എഡിഷനെന്നും വരും മാസങ്ങളിൽ അപേക്ഷാ നടപടികൾ ഭൂരിഭാഗവും ഡിജിറ്റലൈസ് ചെയ്യാൻ സർക്കാർ പദ്ധതിയിടുന്നുണ്ടെന്നും റൂബിയോ കൂട്ടിച്ചേർത്തു. കൂടാതെ, പുതിയ സ്മരണാർത്ഥ പാസ്‌പോർട്ടിന്റെ ആദ്യ പ്രതി അന്ന് രാവിലെ തന്നെ താൻ പ്രസിഡന്റ് ഡൊണാൾഡ് ട്രംപിന് സമ്മാനിച്ചതായും അദ്ദേഹം വെളിപ്പെടുത്തി. “ഇന്ന് രാവിലെ ഞാൻ ഇത് പ്രസിഡന്റിന് നൽകി, അദ്ദേഹത്തിന് ഇത് വളരെ ഇഷ്ടപ്പെട്ടു. ഓഫീസിൽ വരുന്ന എല്ലാവർക്കും കാണിച്ചുകൊടുക്കാനായി ഇത് കുറച്ചുദിവസം തന്റെ പക്കൽ തന്നെ വെക്കാൻ അദ്ദേഹം ആഗ്രഹിക്കുന്നു,” റൂബിയോ പറഞ്ഞു.
