‘ഹീറ്റ് ഡോം’ പ്രതിഭാസത്തെ തുടർന്ന് അമേരിക്കയിലുടനീളം അസഹനീയമായ ചൂട് അനുഭവപ്പെടുന്നു. അമേരിക്കൻ സ്വാതന്ത്ര്യ ദിനാഘോഷങ്ങള്ക്ക് ദിവസങ്ങള് മാത്രം ബാക്കി നിലക്കെ രാജ്യത്തെ പല മേഖലകളിലും ചൂട് വർധിക്കുകയാണ്. കിഴക്കന് തീരപ്രദേശങ്ങളിലുടനീളം അതിശക്തമായ ചൂട് അനുഭവപ്പെടാൻ തുടങ്ങിയതോടെ ന്യൂയോര്ക്ക്, ബോസ്റ്റണ്, ഫിലാഡല്ഫിയ നഗരങ്ങളില് ജാഗ്രതാ നിർദ്ദേശം നൽകി. വടക്കുകിഴക്കന് സംസ്ഥാനങ്ങളില് 38 ഡിഗ്രി താപനിലയാണ് പ്രവചിച്ചിരിക്കുന്നത്. വ്യാഴാഴ്ചയോടെ ഫിലാഡല്ഫിയയിലും ബോസ്റ്റണിലും താപനില 38 ഡിഗ്രി സെല്ഷ്യസിന് മുകളില് ഉയരാൻ സാധ്യതയുണ്ടെന്ന് കാലാവസ്ഥാ വിദഗ്ധര് മുന്നറിയിപ്പ് നല്കി.
അതിശക്തമായ ചൂട് തുടരുന്ന പശ്ചാത്തലത്തില് ന്യൂയോര്ക്ക് മേയര് സൊഹ്റാന് മംദാനി ജനങ്ങളോട് കഴിയുന്നത്ര വീടുകള്ക്കുള്ളില് തന്നെ തുടരാന് നിര്ദേശിച്ചു. ന്യൂയോര്ക്കിലെ ഹാംപ്റ്റണ്ബര്ഗില് ജൂനിയര് ആര്ഒടിസി കേഡറ്റുകളെ കൊണ്ടുപോയ ബസിലെ എയര് കണ്ടീഷന് തകരാറിലായതിനെ തുടര്ന്ന് നിരവധി വിദ്യാർത്ഥികൾക്ക് ആരോഗ്യപ്രശ്നങ്ങൾ നേരിട്ടു. മുന്കരുതലെന്ന നിലയില് ചിലരെ ആശുപത്രിയിലേക്ക് മാറ്റിയതായി ഓറഞ്ച് കൗണ്ടി അധികൃതര് അറിയിച്ചു. ന്യൂയോര്ക്ക് നഗരത്തില് ഭവനരഹിതരെ കണ്ടെത്തി സുരക്ഷിത കേന്ദ്രങ്ങളിലേക്ക് മാറ്റുന്നതിനായി 200-ലധികം സര്ക്കാര് ഉദ്യോഗസ്ഥരുടെയും സന്നദ്ധപ്രവര്ത്തകരുടെയും സംഘത്തെ നിയോഗിച്ചു.
