ഇറാനിലും വെനിസ്വേലയിലും എംബസികൾ തുറക്കാൻ കാനഡയ്ക്ക് നിലവിൽ പദ്ധതികളൊന്നുമില്ലെന്ന് വിദേശകാര്യ മന്ത്രി അനിത ആനന്ദ്. ഇറാനിലെ കനേഡിയൻ പൗരന്മാരുമായി ബന്ധപ്പെടാൻ കാനഡ ഇറ്റലിയെയാണ് ആശ്രയിക്കുന്നത്. എന്നാൽ, കോൺസുലാർ പ്രശ്നങ്ങൾ കൈകാര്യം ചെയ്യുന്നതിൽ ഇടനിലക്കാരനെ ആശ്രയിക്കുന്നത് കാര്യക്ഷമമല്ലെന്നും മന്ത്രി വ്യക്തമാക്കി. കനേഡിയൻ സർക്കാർ നയതന്ത്ര ബന്ധം പുനഃസ്ഥാപിക്കാനും ടെഹ്റാനിലെ എംബസി വീണ്ടും തുറക്കാനും ഉദ്ദേശിക്കുന്നതായി ഇറാനിയൻ ജസ്റ്റിസ് കളക്ടീവ് വെളിപ്പെടുത്തിയതിന് പിന്നാലെയാണ് അനിത ആനന്ദ് നയം വ്യക്തമാക്കിയത്.
അതേസമയം ഇറാനുമായി നയതന്ത്ര ബന്ധം പുനഃസ്ഥാപിക്കാൻ കാനഡ ആഗ്രഹിക്കുന്നില്ലെന്ന് പ്രധാനമന്ത്രി മാർക്ക് കാർണി അറിയിച്ചു. കാരക്കാസിൽ നയതന്ത്രജ്ഞർ ഇല്ലാത്തത് വെനിസ്വേലയിലുണ്ടായ ഭൂചലനം ബാധിച്ച കനേഡിയൻ പൗരന്മാർക്ക് സഹായം ഉറപ്പാക്കുന്നതിൽ പ്രശ്നങ്ങൾ സൃഷ്ടിക്കുന്നുണ്ടെന്നും കാർണി പറഞ്ഞു.
