ലോകത്തിലെ ആദ്യത്തെ യുനെസ്കോ ബയോസ്ഫിയർ റിസർവ് നഗരമായി കാനഡയിലെ ക്യൂബെക് സിറ്റി തിരഞ്ഞെടുക്കപ്പെട്ടു. യുനെസ്കോയുടെ ചരിത്രത്തിൽ ആദ്യമായാണ് പ്രകൃതിദത്ത വനമേഖലകൾക്ക് പകരം ഒരു സമ്പൂർണ്ണ നഗരപ്രദേശത്തിന് ഈ പദവി ലഭിക്കുന്നത്. 14 പുതിയ ബയോസ്ഫിയർ റിസർവുകളുടെ പട്ടികയിലാണ് ക്യൂബെക് സിറ്റി ചരിത്ര നേട്ടം കൈവരിച്ചത്. നഗരത്തിലെ മെട്രോപൊളിറ്റൻ പ്രദേശവും അതിനോട് ചേർന്നുള്ള വെൻഡാകെ ഹ്യൂറോൺ-വെൻഡാറ്റ് ഗോത്രവർഗ്ഗ മേഖലയും ഉൾപ്പെടുന്നതാണ് ഈ റിസർവ്.

ഈ നേട്ടത്തോടെ യുനെസ്കോയുടെ മൂന്ന് വ്യത്യസ്ത പദവികൾ ഒരേസമയം സ്വന്തമാക്കുന്ന അമേരിക്കൻ ഭൂഖണ്ഡത്തിലെ ആദ്യ നഗരമായി ക്യൂബെക് സിറ്റി മാറി. നഗരത്തിലെ ചരിത്രപ്രസിദ്ധമായ കോട്ടമതിലുകൾ മുൻനിർത്തി 1985-ൽ തന്നെ ഓൾഡ് ക്യൂബെക്കിന് യുനെസ്കോ ലോക പൈതൃക പദവി നൽകിയിരുന്നു. ഇതിനുപുറമേ, 2017-ൽ യുനെസ്കോയുടെ ക്രിയേറ്റീവ് സിറ്റീസ് നെറ്റ്‌വർക്കിൻ്റെ ഭാഗമായി സാഹിത്യ നഗരമായും ക്യൂബെക് തിരഞ്ഞെടുക്കപ്പെട്ടിട്ടുണ്ട്.