കേരളത്തിന്റെ തനതായ രുചിവൈവിധ്യങ്ങളെയും പാരമ്പര്യ പാചകരീതികളെയും ആഗോളതലത്തിൽ അടയാളപ്പെടുത്തുക എന്ന ലക്ഷ്യത്തോടെ സംസ്ഥാനത്ത് ഒരു അത്യാധുനിക പാചകകലാ ഇൻസ്റ്റിറ്റ്യൂട്ട് ആരംഭിക്കുന്നു. നമ്മുടെ സമാനതകളില്ലാത്ത രുചിക്കൂട്ടുകളെ അന്താരാഷ്ട്ര ബ്രാൻഡുകളായി ഉയർത്തുന്നതിനൊപ്പം തദ്ദേശീയമായ ഹോസ്പിറ്റാലിറ്റി മേഖലയ്ക്ക് പുതിയൊരു ഉണർവേകാനും ഈ പദ്ധതിയിലൂടെ സാധിക്കും. രാജ്യാന്തര നിലവാരത്തിലുള്ള പ്രൊഫഷണൽ പരിശീലനവും തൊഴിലധിഷ്ഠിത വിദ്യാഭ്യാസവും സംയോജിപ്പിച്ചാണ് ഈ സ്ഥാപനത്തിന്റെ പ്രവർത്തനം വിഭാവനം ചെയ്തിരിക്കുന്നത്. പദ്ധതിയുടെ പ്രാരംഭഘട്ട പ്രവർത്തനങ്ങൾക്കായി ഈ വർഷത്തെ ബജറ്റിൽ 2 കോടി രൂപ ഇതിനോടകം തന്നെ സർക്കാർ വകയിരുത്തിയിട്ടുണ്ട്.
കേരളത്തിന്റെ ഭക്ഷ്യ-ഹോസ്പിറ്റാലിറ്റി മേഖലകളിൽ വിപ്ലവകരമായ മാറ്റങ്ങൾ സൃഷ്ടിക്കുകയാണ് ഈ ഇൻസ്റ്റിറ്റ്യൂട്ടിന്റെ പ്രധാന ലക്ഷ്യം. രാജ്യാന്തര തലത്തിൽ തിളങ്ങാൻ കെൽപ്പുള്ള പ്രൊഫഷണൽ ഷെഫുമാരെ വാർത്തെടുക്കാനും, ഭക്ഷ്യ വ്യവസായ രംഗത്തേക്ക് മികച്ച വിദഗ്ധരെ സംഭാവന ചെയ്യാനും ഈ സ്ഥാപനത്തിന് സാധിക്കും. കേവലം പരിശീലനത്തിനപ്പുറം പാചക മേഖലയിലെ പുതിയ പരീക്ഷണങ്ങൾക്കും ഗവേഷണങ്ങൾക്കും മുൻഗണന നൽകുന്നതോടൊപ്പം, ഹോസ്പിറ്റാലിറ്റി രംഗത്ത് യുവതലമുറയ്ക്കായി വിപുലമായ തൊഴിലവസരങ്ങൾ സൃഷ്ടിക്കാനും ഈ പദ്ധതിയിലൂടെ ലക്ഷ്യമിടുന്നു.
