ആൽബർട്ടയിൽ ഭവന ഇൻഷുറൻസ് പ്രീമിയം തുകയിൽ റെക്കോർഡ് വർധന രേഖപ്പെടുത്തിയതായി സ്റ്റാറ്റിസ്റ്റിക്സ് കാനഡയുടെ റിപ്പോർട്ട്. ആഗോള കാലാവസ്ഥാ വ്യതിയാനങ്ങളും തുടർച്ചയായുണ്ടാകുന്ന പ്രകൃതിദുരന്തങ്ങളുമാണ് പ്രവിശ്യയിലെ ഇൻഷുറൻസ് മേഖലയ്ക്ക് തിരിച്ചടിയായതെന്ന് ഫെഡറൽ ഏജൻസി പറയുന്നു. 2020 ഡിസംബർ മുതൽ 2025 ഡിസംബർ വരെയുള്ള അഞ്ച് വർഷ കാലയളവിനുള്ളിൽ അൽബർട്ടയിലെ ഭവന ഇൻഷുറൻസ് പ്രീമിയം നിരക്കുകളിൽ 55.8 ശതമാനത്തിൻ്റെ വർധന ഉണ്ടായി. ഇത് കാനഡയുടെ ദേശീയ ശരാശരിയായ 38.6 ശതമാനത്തേക്കാൾ വളരെ ഉയർന്ന നിരക്കാണ്. 2005-ന് ശേഷം പ്രവിശ്യയിലെ ഇൻഷുറൻസ് നിരക്കുകൾ 391.6 ശതമാനത്തോളമാണ് വർധിച്ചത്.
പ്രവിശ്യയിൽ സമീപകാലത്തുണ്ടായ കാട്ടുതീയും ശക്തമായ ആലിപ്പഴ വർഷവുമാണ് ഇൻഷുറൻസ് കമ്പനികളെ പ്രീമിയം തുക കുത്തനെ കൂട്ടാൻ നിർബന്ധിതരാക്കിയത്. മുൻ വർഷങ്ങളിൽ കാൽഗറിയിലുണ്ടായ ശക്തമായ ആലിപ്പഴ വർഷം 3 ബില്യൺ ഡോളറിൻ്റെയും, ജാസ്പർ കാട്ടുതീ 1.1 ബില്യൺ ഡോളറിൻ്റെയും ഇൻഷുറൻസ് നഷ്ടമാണ് കമ്പനികൾക്ക് വരുത്തിവെച്ചത്. വരും വർഷങ്ങളിലും കാലാവസ്ഥാ വ്യതിയാനങ്ങൾ കനേഡിയൻ ജനതയുടെ സാമ്പത്തിക ഭദ്രതയ്ക്കും ഭവന ഇൻഷുറൻസ് വിപണിയ്ക്കും നിരന്തരം വെല്ലുവിളി ഉയർത്തുമെന്ന് വിദഗ്ധർ വിലയിരുത്തുന്നു.
