ഗുണനിലവാരക്കുറവിനെ തുടർന്ന് കോസ്‌കോ സ്റ്റോറുകൾ വഴി വിറ്റഴിച്ച ഒരു പ്രത്യേക പാൽ ഉൽപ്പന്നം ഹെൽത്ത് കാനഡ തിരിച്ചുവിളിച്ചു. ലാക്ടാലിസ് കാനഡ (Lactalis Canada) പുറത്തിറക്കിയ ലാക്റ്റാൻ്റിയ അൾട്രാ പ്രോട്ടീൻ & ലാക്ടോസ് ഫ്രീ മിൽക്ക് (2 ലിറ്റർ പാക്കറ്റ്) ആണ് തിരിച്ചുവിളിച്ചത്. മെയ്, ജൂൺ മാസങ്ങളിലായി വിറ്റഴിച്ചതും ജൂൺ 22 എക്സ്പയറി തീയതിയും 1987085 എന്ന ഐറ്റം നമ്പറുമുള്ള പാക്കറ്റുകളാണ് തിരികെ വിളിച്ചിരിക്കുന്നത്.

ഈ പാൽ ഉൽപ്പന്നത്തിൽ വിറ്റാമിൻ എ (Vitamin A), വിറ്റാമിൻ ഡി (Vitamin D) എന്നിവ അനുവദനീയമായ അളവിൽ കൂടുതൽ അടങ്ങിയിട്ടുണ്ടെന്ന് ഫെഡറൽ ഏജൻസി അറിയിച്ചു. ഉയർന്ന അളവിലുള്ള വിറ്റാമിനുകൾ ആരോഗ്യത്തിന് ഹാനികരമായേക്കാമെന്നതിനാൽ ഈ പാൽ കുടിക്കുകയോ ഉപയോഗിക്കുകയോ ചെയ്യരുതെന്ന് കർശനമായ നിർദ്ദേശമുണ്ട്. ഈ പാൽ കൈവശമുള്ളവർ അത് ഉപയോഗിക്കാതെ കോസ്‌കോ വെയർഹൗസുകളിൽ തിരികെ നൽകണം.