ന്യൂഫൗണ്ട്ലാന്‍ഡ് ദ്വീപില്‍ അപ്രതീക്ഷിത സാങ്കേതിക തകരാറിനെ തുടര്‍ന്ന് ആയിരക്കണക്കിന് ഉപഭോക്താക്കള്‍ക്ക് വൈദ്യുതി തടസ്സപ്പെട്ടു. ‘ലാബ്രഡോര്‍ ഐലന്‍ഡ് ലിങ്കില്‍’ (Labrador Island Link) ഉണ്ടായ ട്രിപ്പിങ് ആണ് വ്യാപകമായ വൈദ്യുതി മുടക്കത്തിന് കാരണമായതെന്ന് ന്യൂഫൗണ്ട്ലാന്‍ഡ് പവര്‍ അറിയിച്ചു.
ലാബ്രഡോര്‍ ഐലന്‍ഡ് ലിങ്കിലുണ്ടായ തകരാറിനെ തുടര്‍ന്ന് പവര്‍ ഗ്രിഡിന്റെ സുരക്ഷ മുന്‍നിര്‍ത്തി സിസ്റ്റം സ്വയം സന്തുലിതാവസ്ഥയിലാക്കാന്‍ വൈദ്യുതി വിതരണം താല്‍ക്കാലികമായി വിച്ഛേദിക്കുകയായിരുന്നു. ഒരു പവര്‍ സിസ്റ്റത്തില്‍ പെട്ടെന്ന് തകരാര്‍ ഉണ്ടാകുമ്പോള്‍ മൊത്തത്തിലുള്ള തകരാര്‍ ഒഴിവാക്കാന്‍ ഉപഭോക്താക്കളുടെ വിവിധ ബ്ലോക്കുകളിലേക്കുള്ള വൈദ്യുതി വിതരണം ഓട്ടോമാറ്റിക്കായി വിച്ഛേദിക്കുന്ന രീതിയാണിത്. ന്യൂഫൗണ്ട്ലാന്‍ഡ് ആന്‍ഡ് ലാബ്രാഡര്‍ ഹൈഡ്രോ സോഷ്യല്‍ മീഡിയയിലൂടെയാണ് ഇക്കാര്യം സ്ഥിരീകരിച്ചത്.
ഈ സാങ്കേതിക പ്രക്രിയ കാരണം പ്രവിശ്യയിലുടനീളമുള്ള ഏകദേശം 73,000 ഉപഭോക്താക്കള്‍ക്കാണ് പെട്ടെന്ന് വൈദ്യുതി നഷ്ടമായതെന്ന് ന്യൂഫൗണ്ട്ലാന്‍ഡ് പവര്‍ സിബിസി ന്യൂസിനോട് പറഞ്ഞു. ശനിയാഴ്ച ഉച്ചകഴിഞ്ഞപ്പോഴേക്കും തകരാറുകള്‍ പരിഹരിച്ച് മിക്കയിടങ്ങളിലും വൈദ്യുതി പുനഃസ്ഥാപിക്കാന്‍ അധികൃതര്‍ക്ക് കഴിഞ്ഞിട്ടുണ്ട്.
നിലവില്‍ ആപ്പിള്‍ടണ്‍ പ്രദേശത്തെ ഏകദേശം 800 ഉപഭോക്താക്കളുടെ വൈദ്യുതി മാത്രമാണ് ഇനി പുനഃസ്ഥാപിക്കാനുള്ളത്. അതേസമയം, സണ്ണിസൈഡ്-ക്ലാരന്‍വില്ലെ-ബോണവിസ്റ്റ പെനിന്‍സുല മേഖലയിലും ബെയ് വെര്‍ട്ടെ ജംഗ്ഷന്‍-ഷെപ്പാര്‍ഡ്വില്ലെ പ്രദേശങ്ങളിലും ശനിയാഴ്ച അനുഭവപ്പെട്ട മറ്റ് രണ്ട് പവര്‍ കട്ടുകള്‍ മുന്‍കൂട്ടി നിശ്ചയിച്ചിരുന്ന അറ്റകുറ്റപ്പണികളുടെ ഭാഗമായിരുന്നുവെന്നും അധികൃതര്‍ വ്യക്തമാക്കി.
