കാനഡയിൽ സ്ഥിരതാമസം (PR) ആഗ്രഹിക്കുന്ന ഉദ്യോഗാർത്ഥികളെ ആശങ്കയിലാഴ്ത്തി പുതിയ എക്സ്പ്രസ് എൻട്രി നറുക്കെടുപ്പിൽ കട്ട് ഓഫ് സ്കോറിൽ വൻ വർധന രേഖപ്പെടുത്തി. ഒരു മാസത്തിന് ശേഷം നടന്ന പുതിയ കനേഡിയൻ എക്സ്പീരിയൻസ് ക്ലാസ് (CEC) നറുക്കെടുപ്പിൽ 3,000 ഉദ്യോഗാർത്ഥികൾക്ക് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) ഇൻവിറ്റേഷൻ നൽകി. എന്നാൽ, മുൻ നറുക്കെടുപ്പുകളെ അപേക്ഷിച്ച് ഇത്തവണത്തെ കട്ട് ഓഫ് സ്കോർ 518 ആയി ഉയർന്നു.
ഏപ്രിൽ മാസങ്ങളിൽ 2,000 വീതം ഉദ്യോഗാർത്ഥികൾക്ക് മാത്രം ഇൻവിറ്റേഷൻ നൽകിയപ്പോൾ യഥാക്രമം 515, 514 എന്നിങ്ങനെയായിരുന്നു കട്ട് ഓഫ് സ്കോർ. എന്നാൽ 29 ദിവസത്തെ ഇടവേള വന്നതോടെ ഉയർന്ന സ്കോറുള്ള നിരവധി പുതിയ അപേക്ഷകർ പൂളിലേക്ക് എത്തിച്ചേർന്നു. മെയ് 10-ലെ കണക്കനുസരിച്ച് 501-നും 600-നും ഇടയിൽ സ്കോറുള്ളവർ 15,659 ആയിരുന്നെങ്കിൽ, മെയ് 24 ആയപ്പോഴേക്കും അത് 17,945 ആയി ഉയർന്നു. അപേക്ഷകരുടെ എണ്ണത്തിലുണ്ടായ ഈ വർധന കാരണമാണ്, 518 എന്ന ഉയർന്ന നിരക്കിൽ കട്ട് ഓഫ് സ്കോർ എത്തിയത്.
