മാമ്പഴം കഴിക്കാൻ ഇഷ്ടമില്ലാത്തവർ ചുരുക്കമായിരിക്കും. എന്നാൽ പ്രമേഹരോഗികളെ സംബന്ധിച്ചിടത്തോളം മാമ്പഴം ഒരു വില്ലൻ ആണോ എന്ന സംശയം എപ്പോഴും നിലനിൽക്കുന്നു. മധുരം കൂടുതലായതിനാൽ രക്തത്തിലെ പഞ്ചസാരയുടെ അളവ് കൂടുമെന്ന് ഭയന്ന് പലരും മാമ്പഴം പൂർണമായും ഒഴിവാക്കാറുണ്ട്.

എന്നാൽ, പ്രമേഹമുള്ളവർ മാമ്പഴം തീർത്തും ഒഴിവാക്കണോ? മിതമായ അളവിലും ശരിയായ രീതിയിലും കഴിച്ചാൽ പ്രമേഹരോഗികൾക്കും മാമ്പഴം ആസ്വദിക്കാം എന്നാണ് ആരോഗ്യവിദഗ്ധർ പറയുന്നത്. 

പ്രമേഹരോഗികൾക്ക് മാമ്പഴം കഴിക്കാമോ?

തീർച്ചയായും കഴിക്കാം. മാമ്പഴത്തിൽ പ്രകൃതിദത്തമായ പഞ്ചസാര ഉണ്ടെങ്കിലും, അതിൽ വൈറ്റമിൻ എ, സി, ആന്റിഓക്‌സിഡന്റുകൾ, നാരുകൾ എന്നിവ ധാരാളമായി അടങ്ങിയിട്ടുണ്ട്. മാമ്പഴത്തിന്റെ ഗ്ലൈസെമിക് ഇൻഡക്സ് 51 മുതൽ 60 വരെയാണ്. ഇത് മിതമായ അളവിലുള്ള ജി.ഐ ആയിട്ടാണ് കണക്കാക്കുന്നത്. അതിനാൽ, ശരിയായ അളവിൽ കഴിച്ചാൽ ഇത് പെട്ടെന്ന് രക്തത്തിലെ പഞ്ചസാരയുടെ അളവ് വർധിപ്പിക്കില്ല.

എത്ര അളവ് വരെ കഴിക്കാം?

പ്രമേഹമുള്ളവർ ഒരു ദിവസം ഏകദേശം 80 മുതൽ 100 ഗ്രാം വരെ മാത്രം മാമ്പഴം കഴിക്കുന്നതാണ് ഉചിതം. ഇത് ഒരു ചെറിയ കഷ്ണമോ അല്ലെങ്കിൽ കുറച്ച് ചെറിയ ക്യൂബുകളോ ആയിരിക്കണം. അമിതമാകാതിരിക്കാൻ പ്രത്യേകം ശ്രദ്ധിക്കണം.

മാമ്പഴം ജ്യൂസ് അടിച്ചു കുടിക്കുന്നത് ഒഴിവാക്കണം. ജ്യൂസ് ആക്കുമ്പോൾ അതിലെ നാരുകൾ നഷ്ടപ്പെടുകയും പഞ്ചസാരയുടെ അളവ് പെട്ടെന്ന് കൂടാൻ കാരണമാവുകയും ചെയ്യും. ആഴ്ചയിൽ ഒന്നോ രണ്ടോ തവണ മാത്രം ചെറിയ അളവിൽ കഴിക്കാൻ ശ്രദ്ധിക്കുക. നന്നായി പഴുത്ത മാമ്പഴം വേണ്ട: അമിതമായി പഴുത്ത മാമ്പഴത്തിൽ പഞ്ചസാരയുടെ അളവ് കൂടുതലായിരിക്കും. അതിനാൽ മിതമായി പഴുത്തവ തിരഞ്ഞെടുക്കാം.

എപ്പോഴാണ് മാമ്പഴം കഴിക്കാൻ അനുയോജ്യമായ സമയം?

രാവിലെ: പ്രഭാതഭക്ഷണത്തിന് ശേഷമോ അല്ലെങ്കിൽ ഉച്ചഭക്ഷണത്തിന് ശേഷമോ മാമ്പഴം കഴിക്കാം. ഈ സമയങ്ങളിൽ ശരീരം സജീവമായതിനാൽ പഞ്ചസാര നിയന്ത്രിക്കാൻ എളുപ്പമാണ്.

ഒഴിവാക്കേണ്ടത്: രാത്രിയിലോ വെറും വയറ്റിലോ മാമ്പഴം കഴിക്കുന്നത് രക്തത്തിലെ പഞ്ചസാര പെട്ടെന്ന് ഉയരാൻ കാരണമാകും.

പഞ്ചസാര കൂടാതെ മാമ്പഴം എങ്ങനെ ആസ്വദിക്കാം?

മാമ്പഴം നേരിട്ട് കഴിക്കുന്നതിന് പകരം പ്രോട്ടീനോ നാരുകളോ അടങ്ങിയ ഭക്ഷണത്തോടൊപ്പം കഴിക്കുന്നത് പഞ്ചസാര ആഗിരണം ചെയ്യുന്നത് സാവധാനത്തിലാക്കാൻ സഹായിക്കും. മാമ്പഴത്തോടൊപ്പം കുറച്ച് ബദാം അല്ലെങ്കിൽ വാൾനട്ട്സ് കഴിക്കുന്നത് നല്ലതാണ്. ഓട്‌സ് അല്ലെങ്കിൽ ചിയ സീഡ്‌സ് എന്നിവയ്‌ക്കൊപ്പം മാമ്പഴം ചേർക്കാം. ഗ്രീക്ക് യോഗർട്ട് അല്ലെങ്കിൽ പനീർ എന്നിവയ്‌ക്കൊപ്പം കഴിക്കുന്നതും ഗുണകരമാണ്.

പ്രമേഹമുണ്ടെന്ന് കരുതി മാമ്പഴം പൂർണ്ണമായും ഉപേക്ഷിക്കേണ്ടതില്ല. അളവ് നിയന്ത്രിച്ചും ശരിയായ രീതിയിൽ കഴിച്ചും പ്രമേഹരോഗികൾക്കും ഈ വേനൽക്കാലത്ത് മാമ്പഴത്തിന്റെ രുചി ആസ്വദിക്കാവുന്നതാണ്.